വാഷിങ്ടണ്‍: നിയമ വിരുദ്ധമായി അമേരിക്കയില്‍ കുടിയേറിയവരുടെ കുട്ടികള്‍ക്ക് വാസം ഉറപ്പിക്കുന്ന ഡാക്ക (ഡിഫോര്‍ഡ് ആക്ഷന്‍ ഫോര്‍ ചൈല്‍ഡ്ഹുഡ് അറൈവല്‍സ്) നിര്‍ത്തലാക്കാനുള്ള ട്രംപിന്റെ നീക്കത്തിന് തിരിച്ചടി. ഡാക്ക രാജ്യത്ത് തുടരണമെന്ന് സന്‍ പ്രാന്‌സിസ്‌കോ ജഡ്ജി വില്യം അല്‍സപ് ഉത്തരവിട്ടു. മുന്‍ പ്രിസിഡന്റ് ബറാക് ഒബാമ 2012ല്‍ ആണ് ഡാക്കക്ക്് രാജ്യത്ത് അംഗീകാരം നല്‍കിയത്. ഇതിന്റെ അടിസ്ഥാത്തില്‍ 800,000 കുടിയേറ്റക്കാര്‍ക്ക് നാടുകടത്തുമെന്ന ഭീഷണിയില്ലാതെ ജീവിക്കാനുള്ള അനുമതി നല്‍കിയിട്ടുണ്ട്.
ട്രംപിന്റെ തെരഞ്ഞെടുപ്പ് വാഗ്ദാനങ്ങളില്‍പ്പെട്ടതാണ് ഡാക്ക പിന്‍വലിക്കാനുള്ള തീരുമാനം. കഴിഞ്ഞ വര്‍ഷം സെപ്റ്റംബര്‍ അഞ്ചിനാണ് ഡാക്ക പിന്‍വിലിക്കാനുള്ള നടപടികളുമായി അമേരിക്കന്‍ ഭരണകൂടം നീങ്ങുന്നത്. ഇതിനെതിരേ നിരവധി സംഘടനകളും വ്യക്തികളും കോടതിയെ സമീപിച്ചിരുന്നു. എന്നാല്‍ ഡാക്കക്കെതിരേയുള്ള കോടതി വിധി ഡിപ്പാര്‍ട്ട്‌മെന്റ് ഓഫ് ജസ്റ്റിസിന്റെ തീരുമാനം മാറ്റാനുള്ള ഉത്തരവല്ലെന്നും തങ്ങളുടെ നിലപാടുമായി മുന്നോട്ട്‌പോവുമെന്ന് ജസ്റ്റിസ് ഡിപ്പാര്‍ട്ട്‌മെന്റ് വക്താവ് ഡെവിന്‍ ഒ മെല്ലെ പറഞ്ഞു.