കൊല്ലം: ജില്ലയിലെ മൂന്ന് ഗ്രാമപഞ്ചായത്ത് വാര്‍ഡുകളില്‍ കഴിഞ്ഞ 11ന് നടന്ന ഉപതെരഞ്ഞെടുപ്പിന്റെ ഫലം പ്രഖ്യാപിച്ചു.പടിഞ്ഞാറേ കല്ലട, നെടുവത്തൂര്‍, കൊറ്റങ്കര എന്നീ ഗ്രാമപഞ്ചായത്തുകളിലാണ് ഉപതെരഞ്ഞെടുപ്പ് നടന്നത്. വനിതാ പ്രാതിനിധ്യമുള്ള പടിഞ്ഞാറേ കല്ലട ഗ്രാമപഞ്ചായത്തിലെ നാലാം വാര്‍ഡായ വിളന്തറയില്‍ സി.പി.എമ്മിന്റെ പി. ജയശ്രീ 71 വോട്ടുകള്‍ക്ക് വിജയിച്ചു.
കോണ്‍ഗ്രസിന്റെ രജിന 329 ഉം ബി.ജെ.പിയുടെ വി. പ്രമീളകുമാരി 198 വോട്ടും നേടി. 1159 വോട്ടുകളുള്ള ഇവിടെ ആകെ 927 വോട്ടുകളാണ് പോള്‍ ചെയ്തത്. നെടുവത്തൂര്‍ പഞ്ചായത്തിലെ പുത്തൂര്‍ തെക്കുംപുറം വാര്‍ഡില്‍ നടന്ന ഉപതെരഞ്ഞെടുപ്പില്‍ യു.ഡി.എഫ് സ്ഥാനാര്‍ഥിയായി മത്സരിച്ച ഓമന സുധാകരന്‍ 112 വോട്ടിന്റെ ഭൂരിപക്ഷത്തില്‍ വിജയിച്ചു.
എല്‍.ഡി.എഫ് സ്ഥാനാര്‍ഥി കേരള കോണ്‍ഗ്രസ് ബിയിലെ വി ബേബി 304, ബി. ജെ. പി സ്ഥാനാര്‍ഥി അനീഷ് 233 എന്നിങ്ങനെയാണ് വോട്ട് നില. ആകെ 1338 വോട്ടില്‍ പോള്‍ ചെയ്തത് 953 വോട്ടുകളാണ്.കൊറ്റങ്കര ഗ്രാമപഞ്ചായത്തിലെ മാമ്പുഴ വാര്‍ഡില്‍ എല്‍.ഡി.എഫിന്റെ പി.കെ. വിജയന്‍പിള്ള 197 വോട്ടുകള്‍ക്കാണ് വിജയിച്ചത്. യു.ഡി.എഫ് സ്ഥാനാര്‍ഥിയായി മത്സരിച്ച ആര്‍.എസ്.പിയുടെ പി.കെ വിജയന്‍പിള്ള 178 വോട്ടുനേടി മൂന്നാം സ്ഥാനത്തേക്ക് തള്ളപ്പെട്ടു. ബി.ജെ.പി സ്ഥാനാര്‍ഥി കെ. തുളസീധരന്‍പിള്ള 514 വോട്ടുകള്‍ നേടി രണ്ടാമത്തെതി. ആകെ 1845 വോട്ടില്‍ 1403 എണ്ണം പോള്‍ചെയ്തു.