പൊന്നാനി: നഗരസഭയിലെ ഒന്നാം വാര്‍ഡായ അഴീക്കലില്‍ നടന്ന ഉപതെരഞ്ഞെടുപ്പില്‍ യു.ഡി.എഫ് സ്ഥാനാര്‍ഥി മുസ്‌ലിംലീഗിനെ പറമ്പില്‍ അതീഖിനു ചരിത്ര വിജയം. സി.പി.എമ്മിലെ കെ. ഹസൈനെ എട്ടു വോട്ടുകള്‍ക്കാണ് പരാജയപ്പെടുത്തിയത്. സി.പി.എം കൗണ്‍സിലറായിരുന്ന അബ്ദുല്‍ ഖാദറിന്റെ നിര്യാണത്തെ തുടര്‍ന്നായിരുന്നു ഇവിടെ ഉപതെരഞ്ഞെടുപ്പ്.
ആകെ പോള്‍ ചെയ്ത 1,232 വോട്ടുകളില്‍ 615 വോട്ട് അതീഖ് നേടി. 607 വോട്ടുകള്‍ നേടാനെ ഹസൈനു കഴിഞ്ഞുള്ളൂ. പൊന്നാനി നഗരസഭ നിലവില്‍വന്നതിനു ശേഷം ഇതാദ്യമായാണ് ഈ വാര്‍ഡില്‍ സി.പി.എം പരാജയപ്പെടുന്നത്. വാര്‍ഡില്‍ എസ്.ഡി.പി.ഐ പിന്തുണ യു.ഡി.എഫിനായിരുന്നു. സി.പി.എമ്മിന്റെ മുതിര്‍ന്ന നേതാവായിരുന്ന ഇമ്പിച്ചിബാവയുടെ മണ്ണില്‍ പാര്‍ട്ടി തോറ്റത് സി.പി.എമ്മില്‍ ഏറെ ഞെട്ടലുളവാക്കിയിട്ടുണ്ട്. കഴിഞ്ഞ തവണ മൂന്നു വോട്ടുകള്‍ക്കാണ് അതീഖ് സി.പി.എം സ്ഥാനാര്‍ഥിയോടു പരാജയപ്പെട്ടിരുന്നത്.നഗരസഭയിലെ ഭരണകക്ഷിയായ എല്‍.ഡി.എഫിന് 27, യു.ഡി.എഫിന് 21, ബി.ജെ.പിക്ക് മൂന്ന് എന്നിങ്ങനെയാണ് സീറ്റുനില.