തിരുവനന്തപുരം: കുറഞ്ഞ ചെലവില്‍ ആരോഗ്യ പരിരക്ഷാ സേവനം ലഭ്യമാക്കുതിനായി തലസ്ഥാനത്ത് ആദ്യമായി പൊതുമേഖലയില്‍ സൂപ്പര്‍ സ്‌പെഷ്യാലിറ്റി ഔട്ട് പേഷ്യന്റ് ക്ലിനിക്കുകള്‍ തുടങ്ങുന്നു.
കേന്ദ്ര പൊതുമേഖലാ സ്ഥാപനമായ എച്ച്.എല്‍.എല്‍ ലൈഫ് കെയറിന്റെ കീഴിലുള്ള ഹിന്ദ് ലാബ്‌സ് ഡയഗ്‌നോസ്റ്റിക് സെന്റര്‍ തിരുവനന്തപുരം ഗവ. മെഡിക്കല്‍ കോളജിന് എതിര്‍വശത്തുള്ള ട്രിഡ സോപാനം കോംപ്ലക്‌സിലാണ് ഒ.പി.ഡി ക്ലിനിക്കുകള്‍ തുടങ്ങുന്നത്.
രണ്ട് ഷിഫ്റ്റുകളിലായുള്ള ഒ.പി.ഡി ക്ലിനിക്കുകളുടെ പ്രവര്‍ത്തന സമയം രാവിലെ ഒന്‍പതു മുതല്‍ ഉച്ചയ്ക്ക് ഒന്നു വരെയും വൈകിട്ട് നാലു മുതല്‍ രാത്രി എട്ടു വരെയുമാണ്. ജനറല്‍ മെഡിസിന്‍, ഡയബറ്റോളജി, ഇ.എന്‍.ടി, ഗ്യാസ്‌ട്രോ എന്‍ട്രോളജി, നെഫ്രോളജി, ഓഫ്താല്‍മോളജി, പള്‍മണോളജി, കാര്‍ഡിയോളജി, ഡെര്‍മറ്റോളജി, പീഡിയാട്രിക്‌സ്, ഓര്‍ത്തോപീഡിക്‌സ് എന്നീ വിഭാഗങ്ങളിലാണ് ക്ലിനിക്കുകളുള്ളത്.
തിരുവനന്തപുരം മെഡിക്കല്‍ കോളജ് മുന്‍ പ്രിന്‍സിപ്പല്‍ ഡോ. രാംദാസ് പിഷാരടി, മെഡിക്കല്‍ കോളജിലെ ഗ്യാസ്‌ട്രോ എന്‍ട്രോളജി വിഭാഗം മുന്‍മേധാവി ഡോ. സെല്‍വിന്‍, കേരളത്തിലെ ആദ്യ ഡയബറ്റിക്ക് ക്ലിനിക്കിന്റെ മേധാവി ഡോ. ദിനേശ് പ്രഭു തുടങ്ങി പ്രമുഖ ഡോക്ടര്‍മാരാണ് ക്ലിനിക്കുകള്‍ക്ക് നേതൃത്വം നല്‍കുന്നത്. 24 മണിക്കൂറും പ്രവര്‍ത്തിക്കുന്ന ലാബില്‍ സ്വകാര്യ ലാബുകളെക്കാള്‍ 30 മുതല്‍ 60 ശതമാനം വരെ കുറഞ്ഞ നിരക്കില്‍ പരിശോധനകള്‍ നടത്താം. പരിശോധനാഫലം ഓണ്‍ലൈനിലൂടെയും എസ്.എം.എസിലൂടെയും ലഭ്യമാക്കുകയും ചെയ്യും.