ദുബൈ: കാഴ്ച പരിമിതരുടെ ലോകകപ്പ് ക്രിക്കറ്റില്‍ ഇന്ത്യ മുന്നേറ്റം തുടരുന്നു. പാകിസ്താന് പിന്നാലെ ഇന്ത്യ മറ്റൊരു അയല്‍ക്കാരായ ബംഗ്ലാദേശിനെയും വീഴ്ത്തി. പത്ത് വിക്കറ്റിന്റെ തകര്‍പ്പന്‍ ജയമാണ് ഇന്ത്യ സ്വന്തമാക്കിയത്. ആദ്യം ബാറ്റ് ചെയ്ത ബംഗ്ലാദേശ് നിശ്ചിത 40 ഓവറില്‍ എട്ട് വിക്കറ്റ് നഷ്ടത്തില്‍ 226 റണ്‍സെടുത്തപ്പോള്‍ ഇന്ത്യ വെറും 18.4 ഓവറില്‍ വിക്കറ്റ് നഷ്ടമില്ലാതെ വിജയം സ്വന്തമാക്കുകയായിരുന്നു.
മിന്നും ഫോമിലുള്ള ഇന്ത്യന്‍ ഓപണര്‍ അജയ് റെഡ്ഡി 60 പന്തില്‍ 14 ഫോറുകളുടെ അകമ്പടിയില്‍ സെഞ്ച്വറി (101) നേടി പുറത്താകാതെ നിന്നു. സഹ ഓപണര്‍ സുനില്‍ രമേഷും പുറത്താകാതെ സെഞ്ച്വറി നേടി. 57 പന്തില്‍ 17 ഫോറുകളുമായി സുനില്‍ 105 റണ്‍സാണ് കണ്ടെത്തിയത്.