ന്യൂഡല്‍ഹി: ആഭ്യന്തര സര്‍വിസുകള്‍ക്ക് ഏറ്റവും കുറഞ്ഞ ടിക്കറ്റ് നല്‍കി എയര്‍ ഏഷ്യ. ബംഗളൂരു, കൊച്ചി, ഹൈദരാബാദ്, കൊല്‍ക്കത്ത, ന്യൂഡല്‍ഹി, പൂനെ, റാഞ്ചി എന്നിവിടങ്ങളില്‍ നിന്നുള്ള വിമാന സര്‍വിസുകള്‍ക്കാണ് പ്രത്യേക കിഴിവ് കമ്പനി നല്‍കുന്നത്. 99 രൂപ മുതലാണ് ടിക്കറ്റ് ചാര്‍ജ്. ഇതിനുപുറമെ നികുതിയും അടക്കണം.
പുതിയ ഓഫര്‍ പ്രകാരമുള്ള ടിക്കറ്റുകള്‍ക്കുള്ള ബുക്കിങ് തുടങ്ങിയിട്ടുണ്ട്. ഈ മാസം 21ആണ് ടിക്കറ്റുകള്‍ ബുക്കു ചെയ്യാനുള്ള അവസാന തീയതി. ഇന്നലെ മുതല്‍ അടുത്ത ജൂലൈ 31 വരെയാണ് ഓഫര്‍ വഴി യാത്രചെയ്യാന്‍ കഴിയുക. എയര്‍ ഏഷ്യയുടെ വെബ്‌സൈറ്റ് വഴിയും ആപ്പ് വഴിയും ടിക്കറ്റ് ബുക്ക് ചെയ്യാം.
ചില വിദേശ രാജ്യങ്ങളിലേക്കും കുറഞ്ഞ ചെലവില്‍ യാത്ര ചെയ്യാനുള്ള പദ്ധതിയും എയര്‍ ഏഷ്യ അവതരിപ്പിച്ചിട്ടുണ്ട്. ഇന്ത്യയില്‍ നിന്ന് ഏഷ്യാ-പെസഫിക് മേഖലയിലെ 10 രാജ്യങ്ങളിലേക്ക് 1,499 രൂപ ടിക്കറ്റ് നിരക്കില്‍ യാത്രചെയ്യാമെന്നാണ് എയര്‍ ഏഷ്യയുടെ വാഗ്ദാനം. ഓക്‌ലാന്‍ഡ്, ബാലി, ബാങ്കോക്ക്, ക്വാലാലംപൂര്‍, മെല്‍ബണ്‍, സിംഗപൂര്‍, സിഡ്‌നി തുടങ്ങിയ സ്ഥലങ്ങളിലേക്കാണ് കുറഞ്ഞ ചെലവില്‍ യാത്ര ചെയ്യാനുള്ള സൗകര്യമുള്ളതെന്ന് എയര്‍ ഏഷ്യ പറയുന്നു.