ന്യൂഡല്‍ഹി: ഈ വര്‍ഷം വാനനിരീക്ഷകര്‍ക്ക് വളരെ പ്രിയപ്പെട്ടതാവും. കാരണം 2018 ആരംഭിച്ചത് തന്നെ സൂപ്പര്‍ മൂണ്‍ പ്രതിഭാസത്തോടെയാണ്. മാത്രമല്ല, ആകാശത്ത് വിസ്മയക്കാഴ്ച്ച ഒരുക്കി സൂപ്പര്‍ ബ്ലൂ ബ്ലഡ് മൂണും ഈ വര്‍ഷം എത്തുന്നുണ്ട്. 150 വര്‍ഷങ്ങള്‍ക്കു മുന്‍പാണ് ഈ കാഴ്ച്ച അവസാനമായി ഉണ്ടായത്. അപൂര്‍വമായ ദൃശ്യങ്ങള്‍ക്കാണ് ഈ വര്‍ഷം ജനുവരി 31 ന് സാക്ഷ്യം വഹിക്കാന്‍ പോവുന്നത്.

എന്താണ് സൂപ്പര്‍ ബ്ലൂ ബ്ലഡ് മൂണ്‍ പ്രതിഭാസമെന്നല്ലേ.. ഈ മാസം മൂന്ന് പൂര്‍ണചന്ദ്രനാണ് ആകാശത്ത് തെളിയുക. ആദ്യത്തേത് സൂപ്പര്‍ മൂണ്‍ ആയിരിക്കും( പതിവിലും വലുപ്പത്തിലുള്ള ചന്ദ്രന്‍), രണ്ടാമത്തേത് ബ്ലൂമൂണ്‍. ഇത് ജനുവരി 31 നാണ് ആകാശത്ത് ദര്‍ശിക്കാനാവുക. ഇതിന് ശേഷം വരുന്ന പൂര്‍ണചന്ദ്രനാണ് ബ്ലഡ് മൂണ്‍. പൂര്‍ണ ചന്ദ്രഗ്രഹണ സമയത്താണ് ബ്ലഡ് മൂണ്‍ തെളിയുന്നത്.സമ്പൂര്‍ണ ചന്ദ്രഗ്രഹണത്തോടൊപ്പം ചന്ദ്രന്‍ ചുവപ്പ് നിറമാകുന്ന പ്രതിഭാസമാണ് ബ്ലഡ് മൂണ്‍.

ചന്ദ്രനും സൂര്യനും ഇടയ്ക്ക് ഭൂമി വരികയും ഭൂമിയുടെ നിഴല്‍ ചന്ദ്രന്‍ മറയുന്നതുമാണ് ചന്ദ്രഗ്രഹണം. ഈ സമയത്ത് ഭൂമിയുടെ അന്തരീക്ഷത്തിലൂടെ കടന്നുപോകുന്ന സൂര്യരശ്മികള്‍ വക്രീകരിക്കപ്പെടും. അതുമല്ലെങ്കില്‍ മാര്‍ഗഭ്രംശം സംഭവിച്ച് ചന്ദ്രനില്‍ പതിക്കും. ഇങ്ങനെ വരുമ്പോഴാണ് ചന്ദ്രന്‍ ചുവപ്പായി ദൃശ്യമാകുന്നത്. എല്ലാ ദിവസവും സൂര്യന്‍ അസ്തമിക്കുമ്പോള്‍ സംഭവിക്കുന്നതും ഇതേപ്രതിഭാസമാണ്

എന്തുകൊണ്ടാണ് ഈ ഗ്രഹണം വ്യത്യസ്തമാവുന്നത്?

150 വര്‍ഷത്തിന് ശേഷം ആദ്യമായിട്ടാണ്് ഇത്തരത്തിലൊരു പ്രതിഭാസം നടക്കുന്നത്. അതുകൊണ്ട് തന്നെ ഈ കാഴ്ച്ച വാന നിരീക്ഷകര്‍ക്ക് നല്ല അനുഭവമാണ് സമ്മാനിക്കുക.

അടുത്ത ചന്ദ്രഗ്രഹണം ഇനി എപ്പോഴാണ് ഉണ്ടാവുക?

2028 ഡിസംബര്‍ 31നാണ് അടുത്ത ചന്ദ്രഗ്രഹണം ഉണ്ടാവുക.അതിനു ശേഷം 2037 ജനുവരി 31 നും ഉണ്ടാവും.

അവസാനത്തെ ചന്ദ്രഗ്രഹണം എപ്പോഴാണ് സംഭവിച്ചത്?

എട്ട് ശതമാനം ഭാഗികമായിട്ടുള്ള ഗ്രഹണം നടന്നത് 2009 ഡിസംബര്‍ 31നാണ്.എന്നാല്‍ അതിന് മുന്‍പ് 1866 മാര്‍ച്ച് 31ന് നീല ചന്ദ്രഗ്രഹണം ഉണ്ടായിട്ടുണ്ട്.