വൈക്കം: വേനല്‍ കടത്തതോടെ കുടിവെള്ളമില്ലാതെ മുപ്പതുകുടുംബങ്ങള്‍ ദുരിതത്തില്‍. പൈപ്പ് വെള്ളത്തെ ആശ്രയിച്ചു ജീവിക്കുന്ന ഇവര്‍ക്ക് കഴിഞ്ഞ മൂന്നാഴ്ച്ചയായി കുടിവെള്ളം ലഭിച്ചിട്ട്. ഇത്തരത്തില്‍ വെള്ളമില്ലാതെ നാട്ടുകാര്‍ വലയുമ്പോള്‍ കൃത്യസമയത്ത് കുടിവെള്ളം എത്തിക്കാനുള്ള നടപടി സ്വീകരിക്കാന്‍ അധികൃതര്‍ തയാറാകുന്നില്ല.
ഉദയനാപുരം പഞ്ചായത്തിലെ ഏഴാം വാര്‍ഡില്‍ കണിയാന്തറ കോളനിയിലും സമീപപ്രദേശങ്ങളിലും താമസിക്കുന്ന 30 കുടുംബങ്ങളാണ് ദുരിതത്തിലായിരിക്കുന്നത്. വാട്ടര്‍ അതോറിറ്റിയുടെയും പഞ്ചായത്തിന്റെയും പിടിപ്പുകേടുകൊണ്ടാണ് ഇവിടെ ഇത്രയും ദിവസമായിട്ടും കുടിവെള്ളം ലഭിക്കാത്തതെന്ന് മുന്‍പഞ്ചായത്ത് അംഗവും ഉദയനാപുരം കോണ്‍ഗ്രസ് മണ്ഡലം പ്രസിഡന്റുമായ വി.ബിന്‍സ് ആരോപിച്ചു.
പ്രദേശത്താകെ തോടുകളിലും കിണറുകളിലും ഉപ്പുവെള്ളമാണ്. ഇതോടെ പ്രദേശവാസികളുടെ ഏക ആശ്രയം പൈപ്പുവെള്ളമാണ്. ഈ സാഹചര്യത്തില്‍ വാട്ടര്‍ അതോറിറ്റിയും ബന്ധപ്പെട്ട മറ്റ് അധികാരികളും ചേര്‍ന്ന് വിഷയം അടിയന്തരമായി പരിഹരിച്ചില്ലെങ്കില്‍ പ്രദേശവാസികളെ സംഘടിപ്പിച്ച് വാട്ടര്‍ അതോറിട്ടി ഓഫിസ് ഉപരോധിക്കുമെന്ന് ബിന്‍സ് പറഞ്ഞു.