തൃശൂര്‍: ന്യൂ ജനറേഷന്‍ മയക്കുമരുന്നുമായി യുവ എന്‍ജിനീയര്‍ പിടിയില്‍. 23 എല്‍.എസ്.ഡി സ്റ്റാമ്പുമായി ഗൂഡല്ലൂര്‍ സ്വദേശി ജസ്റ്റിന്‍ പൗലോസിനെയാണ് തൃശൂര്‍ എക്‌സൈസ് റേഞ്ച് അധികൃതര്‍ പിടികൂടിയത്. പോപ്പ് ഗായകന്‍ ജസ്റ്റിന്‍ ബീബര്‍ എന്ന പേരിലാണ് ജസ്റ്റിന്‍ അറിയപ്പെട്ടിരുന്നത്. ഓണ്‍ലൈന്‍ മയക്കുമരുന്ന് വ്യാപാര ശൃംഖലയില്‍ നുഴഞ്ഞു കയറി അവര്‍ക്കിടയിലെ കോഡ് കണ്ടെത്തിയാണ് പ്രതിയെ എക്‌സൈസ് പിടികൂടിയത്. ശിവ എന്ന പേരിലറിയപ്പെടുന്ന എല്‍.എസ്.ഡി സ്റ്റാമ്പ് ജസ്റ്റിനില്‍ നിന്ന് പിടിച്ചെടുത്തു. പിടിച്ചെടുത്ത മയക്കുമരുന്നിന് രണ്ടര ലക്ഷം രൂപ വിലവരും. സ്പീഡ് പോസ്റ്റ് വഴിയും കൊറിയര്‍ വഴിയുമാണ് വിദേശ രാജ്യങ്ങളില്‍ നിന്ന് പ്രതിക്ക് മയക്കുമരുന്നു ലഭ്യമാകുന്നതെന്ന് എക്‌സൈസ് അധികൃതര്‍ പറഞ്ഞു.