ബംഗളൂരു: അനധികൃത സ്വത്ത് സമ്പാദനക്കേസില്‍ ബംഗളൂരു പരപ്പന അഗ്രഹാര ജയിലില്‍ കഴിയുന്ന അണ്ണാ ഡി.എം.കെ നേതാവ് വി.കെ ശശികലക്ക് പ്രത്യേക സൗകര്യങ്ങള്‍ ലഭിക്കുന്നുണ്ടെന്നതുസംബന്ധിച്ച് അന്വേഷണത്തിന് ലോകായുക്ത ഉത്തരവിട്ടു. നേരത്തെ അന്വേഷണം നടത്തിയിരുന്ന പൊലിസ് ഉദ്യോഗസ്ഥ ഡി. രൂപയാണ് ശശികലക്ക് അനധികൃത സൗകര്യങ്ങള്‍ ജയിലില്‍ ലഭിക്കുന്നുണ്ടെന്ന് കണ്ടെത്തിയത്. ശശികലക്ക് കൂടുതല്‍ സൗകര്യങ്ങള്‍ ലഭിക്കാന്‍ അവര്‍ ജയില്‍ അധികൃതര്‍ക്ക് രണ്ടുകോടി രൂപ നല്‍കിയിരുന്നുവെന്നും രൂപയുടെ അന്വേഷണത്തില്‍ വ്യക്തമായിരുന്നു. എന്നാല്‍ ആരോപണത്തിന് പിന്‍ബലമില്ലെന്ന് വ്യക്തമാക്കി അന്വേഷണ റിപ്പോര്‍ട്ട് ഉന്നത പൊലിസ് വൃത്തങ്ങള്‍ തള്ളിയിരുന്നു. ഇതാണ് ഇപ്പോള്‍ വീണ്ടും അന്വേഷിക്കണമെന്ന് ലോകായുക്ത ഉത്തരവിട്ടത്.