മൊണാക്കോ: ആറു മാസത്തെ കാത്തിരിപ്പ് അവസാനിപ്പിച്ച് ലോക ചാംപ്യന്‍ ലൂയിസ് ഹാമില്‍ട്ടണ്‍ ഒടുവില്‍ ജയം സ്വന്തമാക്കി. മൊണാക്കോ ഗ്രാന്‍ഡ് പ്രിക്‌സിലെ ആവേശകരമായ പോരാട്ടത്തില്‍ ആസ്‌ത്രേലിയയുടെ റെഡ് ബുള്‍ താരം ഡാനിയല്‍ റിക്കാര്‍ഡോയെ രണ്ടാം സ്ഥാനത്തേക്ക് പിന്തള്ളിയാണ് മെര്‍സിഡസിന്റെ ഹാമില്‍ട്ടണ്‍ അപ്രതീക്ഷിത ജയം സ്വന്തമാക്കിയത്. 2015ല്‍ അമേരിക്കന്‍ ഗ്രാന്‍ഡ് പ്രിക്‌സില്‍ കിരീടം നേടിയ ശേഷമുള്ള ഹാമില്‍ട്ടന്റെ ആദ്യ ജയം കൂടിയാണിത്.
പ്രസിദ്ധമായ മെഡിറ്ററേനിയന്‍ സ്ട്രീറ്റില്‍ രണ്ടാം വിജയം കുറിക്കാനും ഇതിലൂടെ ഹാമില്‍ട്ടന് സാധിച്ചു. മത്സരത്തില്‍ മെക്‌സിക്കോയുടെ സെര്‍ജിയോ പെരസ് മൂന്നാം സ്ഥാനം സ്വന്തമാക്കി. എന്നാല്‍ ഫെരാരിയുടെ സെബാസ്റ്റ്യന്‍ വെറ്റലും സ്‌പെയിനിന്റെ ഫെര്‍ണാണ്ടോ അലോണ്‍സോയ്ക്കും മികവിലേക്കുയരാനായില്ല.