ന്യൂഡല്‍ഹി: 20 എം.എല്‍.എമാരെ അയോഗ്യരാക്കിയ തെരഞ്ഞെടുപ്പ് കമ്മിഷന്റെ തീരുമാനത്തിന് രാഷ്ട്രപതി അംഗീകാരം നല്‍കിയത് ഭരണഘടന വിരുദ്ധമെന്ന് ആം ആദ്മി പാര്‍ട്ടി.
ജനാധിപത്യത്തിന്റെ അപകടകരമായ സാഹചര്യമാണ് ഇപ്പോഴുള്ളതെന്ന് ആം ആദ്മി നേതാവ് അശുതേഷ് പറഞ്ഞു.
രാഷ്ട്രപതിയുടെ തീരുമാനം വന്നതിനാല്‍ നീതിക്കായി ഹൈക്കോടതിയിലേക്ക് പോവുമെന്ന് അയോഗ്യരാക്കപ്പെട്ട കസ്തുര്‍ഭാ നഗര്‍ എം.എല്‍.എ മദന്‍ലാല്‍ പറഞ്ഞു.
ഹൈക്കോടതിയില്‍ നിലവിലെ തീരുമാനത്തില്‍ വ്യത്യസ്തമായി ആശ്വാസകരമായി വിധിയുണ്ടാവുമെന്ന് പ്രതീക്ഷിക്കുന്നുവെന്ന് മദന്‍ലാല്‍ പറഞ്ഞു. രാഷ്ട്രപതിയുടെ തീരുമാനത്തിനെതിരേ മുതിര്‍ന്ന ബി.ജെ.പി നേതാവ് യശ്വന്ത് സിന്‍ഹ രംഗത്തെത്തി.
രാഷട്രപതിയുടെ തീരുമാനം തുഗ്ലിക്കിയന്‍ തീരുമാനത്തെക്കാള്‍ മോശമാണ്. എം.എല്‍.എ മാരുടെ വാദം കേള്‍ക്കാതെയുള്ള തീരുമാനം നീതി നിഷേധമാണെന്ന് യശ്വന്ത് സിന്‍ഹ ട്വിറ്ററിലൂടെ കുറ്റപ്പെടുത്തി.
ആം ആദ്മി പാര്‍ട്ടിയെ പിന്തുണച്ച് ബി.ജെ.പി നേതാവ് ശത്രുഘ്‌നന്‍ സിന്‍ഹയും രംഗത്തെത്തി.
നിലവിലെ പ്രതിസന്ധിയില്‍ ആശങ്കപ്പെടേണ്ട കാര്യമില്ലെന്ന് ചൂണ്ടിക്കാട്ടിയ ശത്രുഘ്‌നന്‍ സിന്‍ഹ സ്ഥാപിത താല്‍പര്യങ്ങളുള്ള രാഷ്ട്രീയ കളികള്‍ക്ക് നിലനില്‍പ്പുണ്ടാവില്ലെന്ന് അഭിപ്രായപ്പെട്ടു. എം.എല്‍.എ മാരെ അയോഗ്യരാക്കിയ നടപടിയില്‍ വിഷമിക്കേണ്ടതില്ലെന്ന് അദ്ദേഹം ട്വിറ്ററിലൂടെ പറഞ്ഞു.
എല്ലായിടത്തും നിങ്ങളാണ് ചര്‍ച്ചാ വിഷയം. പിന്നെ നിങ്ങളെന്തിനാണ് ആശങ്കപ്പെടേണ്ടതെന്ന് അദ്ദേഹം ട്വീറ്റ് ചെയ്തു.