തൊടുപുഴ: ഏകീകൃത ഡ്രൈവിങ് ലൈസന്‍സ് നല്‍കുന്നതിന്റെ ഭാഗമായി കേന്ദ്ര സര്‍ക്കാര്‍ തുടക്കമിട്ട സാരഥി 4 സംവിധാനം സംസ്ഥാനത്തെ ആര്‍.ടി ഓഫിസുകളില്‍ നടപ്പിലാക്കുന്നു.
പരമ്പരാഗത രീതികളില്‍നിന്ന് വ്യത്യസ്തമായി അപേക്ഷ സമര്‍പ്പണരീതി മുതല്‍ മാറ്റംവരുന്നതിനാല്‍ ഇതുസംബന്ധിച്ച 12 ഇന നിര്‍ദേശങ്ങള്‍ അടങ്ങിയ സര്‍ക്കുലര്‍ ട്രാന്‍സ്‌പോര്‍ട്ട് കമ്മിഷണര്‍ പുറപ്പെടുവിച്ചു.
ഡ്രൈവിങ് ലൈസന്‍സിന് ഓണ്‍ലൈനില്‍ അപേക്ഷിക്കുമ്പോള്‍ വെബ്‌സൈറ്റില്‍ പറയുന്ന രേഖകള്‍ സ്‌കാന്‍ ചെയ്ത് സമര്‍പ്പിക്കണം. പോരായ്മകള്‍ ശ്രദ്ധയില്‍പ്പെട്ടാല്‍ ബന്ധപ്പെട്ട ഉദ്യോഗസ്ഥന്‍ പ്രസ്തുതവിവരം രേഖപ്പെടുത്തി അപേക്ഷ നിരസിക്കും. നിലവിലുള്ള ലൈസന്‍സുകളുടെ തുടര്‍ സേവനങ്ങള്‍ക്ക് അനുബന്ധ രേഖകള്‍ തപാല്‍വഴി അയക്കണം.
അപേക്ഷ തപാല്‍ വഴിയോ ഓഫിസില്‍ നേരിട്ടോ സമര്‍പ്പിച്ചാല്‍ ബന്ധപ്പെട്ട ക്ലര്‍ക്ക് പരിശോധിച്ച് ആവശ്യമായ അനുബന്ധ രേഖകള്‍ ഉണ്ടോയെന്ന് ഉറപ്പുവരുത്തിയശേഷം മാത്രമേ നമ്പര്‍ രേഖപ്പെടുത്താവൂ.
അപൂര്‍ണ അപേക്ഷകള്‍ ലഭിക്കുന്ന ദിവസംതന്നെ പോരായ്മകള്‍ ചൂണ്ടിക്കാട്ടി അപേക്ഷകന് അയച്ചുകൊടുക്കേണ്ടതാണ്. തപാലധികൃതരുടെ ഭാഗത്തുനിന്ന് ഉണ്ടാകുന്ന കാലതാമസത്തിന് മോട്ടോര്‍ വാഹന വകുപ്പ് ഉത്തരവാദി ആയിരിക്കില്ലെന്ന് സര്‍ക്കുലര്‍ എടുത്തുപറയുന്നു.
സാരഥി 4 പ്രകാരം ലേണേഴ്‌സ് ടെസ്റ്റ് സൈദ്ധാന്തികമായ അറിവ് പരിശോധനയായതിനാല്‍ ഒരിക്കല്‍ ലേണേഴ്‌സ് വിജയിച്ചയാളിന് കാലാവധി നീട്ടിക്കിട്ടുന്നതിന് വീണ്ടും ടെസ്റ്റ് നടത്തേണ്ടതില്ല.
വിരമിച്ച ഓഫിസ് മേധാവിയുടെ യൂസര്‍ അക്കൗണ്ട് സംസ്ഥാന അഡ്മിനിസ്‌ട്രേറ്ററെയും ആര്‍.ടി.ഒയെയും അറിയിച്ച് അസാധുവാക്കിയെന്ന് ഉറപ്പുവരുത്തേണ്ടതാണെന്നും ട്രാന്‍സ്‌പോര്‍ട്ട് കമ്മിഷണറുടെ ഉത്തരവില്‍ പറയുന്നു.