കോപന്‍ഹേഗന്‍: കാറ്റലോണിയ മുന്‍ നേതാവ് കാര്‍ലെസ് പുജിമോന്റിനെതിരേ അറസ്റ്റിനു നീക്കവുമായി സ്പാനിഷ് അധികൃതര്‍. പുജിമോന്റ് ഡെന്മാര്‍ക്കിലെത്തിയതിനെ തുടര്‍ന്നാണ് അറസ്റ്റ് നീക്കവുമായി സ്പാനിഷ് വൃത്തങ്ങള്‍ രംഗത്തെത്തിയത്. ഇവിടെ കോപന്‍ഹേഗന്‍ സര്‍വകലാശാലയില്‍ നടന്ന ചടങ്ങില്‍ അദ്ദേഹം പങ്കെടുത്തു.
നിലവില്‍ ബെല്‍ജിയത്തിലാണ് കാര്‍ലെസ് പുജിമോന്റ് കഴിയുന്നത്. അദ്ദേഹത്തോടൊപ്പം മുന്‍ മന്ത്രിസഭയിലെ അംഗങ്ങളും ഇവിടെ കഴിയുന്നുണ്ട്. ഒക്ടോബറിലാണ് പുജിമോന്റും മന്ത്രിമാരും സ്പാനിഷ് സര്‍ക്കാരിന്റെ അറസ്റ്റ് നീക്കം ഭയന്ന് ബെല്‍ജിയത്തിലേക്കു കടന്നത്. സ്‌പെയിനില്‍ ഇദ്ദേഹത്തിനെതിരേ കലാപ ആഹ്വാനം, രാജ്യദ്രോഹം, പൊതുസ്വത്തിന്റെ ദുരുപയോഗം തുടങ്ങിയ കുറ്റങ്ങള്‍ നിലനില്‍ക്കുന്നുണ്ട്. 30 വര്‍ഷം വരെ തടവുശിക്ഷ ലഭിക്കാവുന്ന കുറ്റമാണിവ.