തിരുവനന്തപുരം: പരന്ന വായനയും വരികള്‍ക്കപ്പുറമുള്ള അറിവുമാണ് മത്സരപരീക്ഷകള്‍ക്ക് അത്യാവശ്യമായിട്ടുള്ളതെന്ന് വിദ്യാഭ്യാസ മന്ത്രി പ്രൊഫ. സി. രവീന്ദ്രനാഥ്. മലപ്പുറം ജില്ലയിലെ അരീക്കോട് സുല്ലമുസ്സലാം ഓറിയന്റല്‍ ഹയര്‍ സെക്കന്‍ഡറി സ്‌കൂളിലെ സിവില്‍ സര്‍വിസ് പരിശീലന പദ്ധതിയായ ആസ്‌പെയര്‍ അക്കാദമിയിലെ വിദ്യാര്‍ഥികളുമായി സംവദിക്കുകയായിരുന്നു മന്ത്രി. ഔദ്യോഗിക തിരക്കുകള്‍ മാറ്റിവച്ച് നിയമസഭാ കോണ്‍ഫറന്‍സ് ഹാളില്‍ പി.കെ ബഷീര്‍ എം.എല്‍.എയുടെ സാന്നിധ്യത്തിലാണ് അദ്ദേഹം കുട്ടികളുടെ സംശയങ്ങള്‍ക്ക് മറുപടി നല്‍കിയത്.
മന്ത്രി കെ.ടി ജലീല്‍, മലപ്പുറം ജില്ലാ കളക്ടര്‍ അമിത് മീണ തുടങ്ങിയ പ്രമുഖര്‍ നേരത്തെ ആസ്‌പെയര്‍ വിദ്യാര്‍ഥികള്‍ക്ക് ക്ലാസ് എടുത്തിരുന്നു. സ്‌കൂളില്‍ നടക്കുന്ന സിവില്‍ സര്‍വിസ് പരിശീലന പദ്ധതിയെ മന്ത്രി പ്രത്യേകം ശ്ലാഘിച്ചു.
പി.കെ ബഷീര്‍ എം.എല്‍.എയുടെ പ്രത്യേക താല്‍പര്യപ്രകാരമാണ് വിദ്യാഭ്യാസ മന്ത്രിയുമായി കുട്ടികള്‍ക്ക് കൂടിക്കാഴ്ചയ്ക്ക് അവസരം ലഭിച്ചത്. തുടര്‍ന്ന് തിരുവനന്തപുരം ജില്ലാ കലക്ടര്‍ ഡോ.വാസുകിയുമായും വിദ്യാര്‍ഥികള്‍ സംവദിച്ചു.
സ്‌കൂള്‍ പ്രിന്‍സിപ്പല്‍ കെ.ടി മുനീബു റഹ്മാന്‍, അധ്യാപകരായ എന്‍.കെ. യൂസഫ്, ഡോ.എന്‍. ലബീദ്, ഷിജി.കെ.പി, എം.പി. ഷരീഫ്, എം.പി.റഹ്മത്തുല്ല, മുഹസിന്‍.സി, റാഫി ചൊനാരി, ജസീമ വി.പി, നൂര്‍ജഹാന്‍ ടി.പി തുടങ്ങിയവരും വിദ്യാര്‍ഥികളെ അനുഗമിച്ചിരുന്നു.