നിലമ്പൂര്‍: കാട്ടുതീ തടയുന്നതിന്റെ ഭാഗമായി നിലമ്പൂര്‍ നോര്‍ത്ത്, സൗത്ത് ഡിവിഷന്‍ പരിധികളില്‍ വ്യാപക അഴിമതി നടക്കുന്നുവെന്ന വാര്‍ത്തയുടെ അടിസ്ഥാനത്തില്‍ അന്വേഷണം നടത്തുമെന്നു കോഴിക്കോട് വനം വിജിലന്‍സ് ഡി.എഫ്.ഒ പി.കെ ആസിഫ്. ഫയര്‍ലൈന്‍ നിര്‍മാണത്തിന്റെ മറവില്‍ വനംവകുപ്പില്‍ വന്‍ അഴിമതി എന്ന തലക്കെട്ടോടെ ഒന്‍പതിനു സുപ്രഭാതം വാര്‍ത്ത പ്രസിദ്ധീകരിച്ചിരുന്നു. വാര്‍ത്ത പുറത്തുവന്നതോടെയാണ് അന്വേഷണം നടത്താന്‍ വനംവകുപ്പ് തയാറായത്.
കരാറുകാര്‍, ഉദ്യോഗസ്ഥര്‍ എന്നിവരില്‍നിന്നു നേരിട്ട് തെളിവെടുപ്പ് നടത്തുമെന്നും അദ്ദേഹം പറഞ്ഞു. ഫയര്‍ലൈന്‍ നിര്‍മാണത്തിന്റെ മറവില്‍ പ്രവര്‍ത്തിയുടെ 50 ശതമാനംവരെ ഉദ്യോഗസ്ഥര്‍ ചോദിച്ചുവാങ്ങുന്നുവെന്ന് കണ്‍വീനര്‍മാര്‍ ആരോപിച്ചിരുന്നു. നിലമ്പൂര്‍ നോര്‍ത്ത്, സൗത്ത് ഡിവിഷനുകളിലായി 120 കിലോമീറ്ററുകളോളം ഫയര്‍ലൈന്‍ നിര്‍മാണമാണ് നടക്കുന്നത്. പ്രവൃത്തി നടത്തുന്നതില്‍ ഭൂരിഭാഗവും ഉദ്യോഗസ്ഥരുടെ ബിനാമി കരാറുകാരാണ്. 40 ശതമാനം നല്‍കാമെന്ന് പറഞ്ഞെങ്കിലും 50 ല്‍ കുറഞ്ഞ വിഹിതം പറ്റില്ലെന്ന നിലപാട് ഉദ്യോഗസ്ഥര്‍ സ്വീകരിച്ചതോടെയാണ് ചില കണ്‍വീനര്‍മാര്‍ ഇടഞ്ഞത്.
വര്‍ഷങ്ങളായി വനത്തിനുള്ളിലെ ഇത്തരം പ്രവൃത്തികള്‍ക്ക് കൃത്യമായ വിഹിതമാണ് ഉദ്യോഗസ്ഥര്‍ വാങ്ങുന്നത്. അതിനാല്‍ പ്രവൃത്തികള്‍ പലതും എസ്റ്റിമേറ്റ് പ്രകാരം ചെയ്യാന്‍ കഴിയാത്ത അവസ്ഥയാണ് കരാറുകാര്‍ക്ക്.
അന്വേഷണം നടത്തുമെന്ന് വിജിലന്‍സ് ഡി.എഫ്.ഒ പറയുമ്പോഴും കഴിഞ്ഞ ആറു മാസത്തിനുള്ളില്‍ വനത്തിനുള്ളിലെ അഴിമതികളുമായി ബന്ധപ്പെട്ട് ഒരു പരാതിയില്‍പോലും നടപടികള്‍ സ്വീകരിക്കാന്‍ ഡി.എഫ്.ഒ തയാറായിട്ടില്ലെന്നും ആരോപണമുയര്‍ന്നിട്ടുണ്ട്.