വളാഞ്ചേരി: ദേശീയപാതയിലെ വളാഞ്ചേരി വട്ടപ്പാറ വളവില്‍ ടാങ്കര്‍ ലോറി മറിഞ്ഞു. മംഗലാപുരത്തുനിന്നു പാചകവാതകം നിറച്ച് കൊച്ചിയിലേക്ക് പോവുകായിരുന്ന ബുള്ളറ്റ് ടാങ്കറാണ് വട്ടപ്പാറയിലെ പ്രധാന വളവില്‍ നിയന്ത്രണംവിട്ട് മറിഞ്ഞത്.
ഇന്നലെ രാത്രി എട്ടോടെയാണ് അപകടമുണ്ടായത്. അപകടത്തില്‍ ഡ്രൈവര്‍ തമിഴ്‌നാട് രാമനാദപുരം സുദിയൂര്‍ സ്വദേശി ശരവണ പാണ്ഡ്യന്(36) പരുക്കേറ്റു. ഇയാളെ വളാഞ്ചേരിയിലെ സ്വകാര്യ ആശുപത്രിയില്‍ പ്രവേശിപ്പിച്ചു.
അപകടത്തെ തുടര്‍ന്ന് വാതകം ചോര്‍ന്നത് നാട്ടുകാരില്‍ പരിഭ്രാന്തി പരത്തി. അപകടം നടന്ന ഉടന്‍ നാട്ടുകാര്‍ രക്ഷാപ്രവര്‍ത്തനത്തിന് നേതൃത്വം നല്‍കുകയും വൈദ്യുതിബന്ധം വിഛേദിക്കുകയും ചെയ്തു.
പരിസരവാസികളോട് മാറിത്താമസിക്കാന്‍ മുന്നറിയിപ്പ് നല്‍കി.
ദേശീയപാത അടച്ച് വാഹനങ്ങള്‍ അമ്പലപറമ്പ് താണിയപ്പന്‍കുന്ന് വഴി തിരിച്ചുവിട്ടു.
പൊന്നാനി, തിരൂര്‍, എന്നിവിടങ്ങളില്‍നിന്നുള്ള ഫയര്‍ ഫോഴ്‌സ് യൂനിറ്റുകളെത്തിയാണ് രക്ഷാപ്രവര്‍ത്തനത്തിന് നേതൃത്വം നല്‍കിയത്. ഇന്ത്യന്‍ ഓയില്‍ കോര്‍പ്പറേഷന്‍ ഉദ്യോഗസ്ഥരെത്തി ചോര്‍ച്ചയടക്കാനുള്ള ശ്രമങ്ങളും നടത്തി.