മട്ടാഞ്ചേരി: സ്‌കൂളില്‍ ടാല്‍കം പൗഡറുമായി എത്തി അത് മുഖത്ത് പുരട്ടിയതിന് അധ്യാപകന്‍ വിദ്യാര്‍ഥിനിയെ മര്‍ദിച്ചതായി പരാതി. മട്ടാഞ്ചേരി ആസിയാ ഭായി സ്‌കൂളിലാണ് സംഭവം.
മട്ടാഞ്ചേരി കപ്പലണ്ടിമുക്ക് സഫീറിന്റെ മകളും ആറാം ക്ലാസ് വിദ്യാര്‍ഥിനിയുമായ സഫാ മര്‍വ എന്ന പതിമൂന്നുകാരിയെ സ്‌കൂളിലെ പി.ടി അധ്യാപകന്‍ മര്‍ദിച്ചതായാണ് പരാതി. വിദ്യാര്‍ഥിനി മട്ടാഞ്ചേരി സ്ത്രീകളുടേയും കുട്ടികളുടേയും ആശുപത്രിയില്‍ ചികിത്സയിലാണ്.
മുഖത്ത് കരിമഷി പുരട്ടുകയും ഇരുപത് മിനുറ്റോളം വെയിലത്ത് നിര്‍ത്തുകയും ചെയ്തതായി വിദ്യാര്‍ഥിനി പറഞ്ഞു. പിന്നീട് ക്ലാസിനകത്ത് കയറ്റിയെങ്കിലും മുഖം കഴുകാന്‍ അനുവദിച്ചില്ല. പ്രിന്‍സിപ്പലും തന്നെ മര്‍ദിച്ചതായി വിദ്യാര്‍ഥിനി പറഞ്ഞു.
സംഭവത്തില്‍ പൊലിസ് കുട്ടിയുടെ മൊഴി രേഖപ്പെടുത്തി. അതേസമയം കുട്ടിയെ ശാസിക്കുക മാത്രമാണുണ്ടായതെന്നു സ്‌കൂള്‍ അധികൃതര്‍ വ്യക്തമാക്കി.