തെസാലോനികി(ഗ്രീസ്): രണ്ടാം ലോക മഹായുദ്ധകാലത്തെ ബോംബ് നിര്‍വീര്യമാക്കാന്‍ ഗ്രീസ് 70,000 പേരെ ഒഴിപ്പിക്കുന്നു.തെസാലോനികിയി എന്ന പ്രദേശത്തുവച്ചാണ് 250 കിലോഗ്രാം ഭാരമുള്ള ബോംബ് നിര്‍വീര്യമാക്കുന്നത്. കഴിഞ്ഞ ആഴ്ച റോഡ് നിര്‍മാണത്തിന് മണ്ണ് നീക്കുമ്പോഴാണ് ബോംബ് കണ്ടെത്തിയത്.  ഇന്ന് രാവിലെ നിര്‍വീര്യമാക്കാനാണ് തീരുമാനം. ഇതിന്റെ ഭാഗമായി ഇന്നലെ പ്രദേശത്തുനിന്ന് ആളുകളെ ഒഴിപ്പിച്ചു തുടങ്ങി.കിടപ്പിലായ രോഗികളെയും 300 അംഗപരിമിതരെയുമാണ് ആദ്യഘട്ടത്തില്‍ ഒഴിപ്പിച്ചത്. ഇതിനായി 20 ആംബുലന്‍സുകള്‍ ഉപയോഗിച്ചു. ഗ്രീസിലെ പ്രധാനപ്പെട്ട രണ്ടാമത്തെ നഗരത്തിലാണ് ബോംബ് നിര്‍വീര്യമാക്കല്‍ നടക്കുന്നത്. 1.9 കി.മി ദൂരത്തിലുള്ളവരെയാണ് ഒഴിപ്പിക്കുന്നത്.
ഇന്ന് രാവിലെ പ്രാദേശിക സമയം എട്ടിനാണ് നിര്‍വീര്യമാക്കല്‍. ആവശ്യമായ സുരക്ഷാ സംവിധാനങ്ങള്‍ ഒരുക്കിയതായി മേഖലാ സുരക്ഷാ മേധാവി അപോസ്റ്റലോസ് പറഞ്ഞു.