കല്‍പ്പറ്റ: മദ്‌റസാ മാനേജ്‌മെന്റ് അസോസിയേഷന്‍ സംസ്ഥാന പ്രസിഡന്റായി തെരഞ്ഞെടുക്കപ്പെട്ട കെ.ടി ഹംസ മുസ്‌ലിയാരെ ആദരിക്കാന്‍ സമസ്ത ജില്ലാ മുശാവറ തീരുമാനിച്ചു.
മൂന്ന് പതിറ്റാണ്ടിലേറെയായി സമസ്ത കേന്ദ്ര മുശാവറ അംഗവും സമസ്തയുടെ ജില്ലാ പ്രസിഡന്റായും ഡബ്ല്യു.എം.ഒ ദാറുല്‍ ഉലൂം അറബിക് കോളജിന്റെയും ശംസുല്‍ ഉലമ ഇസ്‌ലാമിക് അക്കാദമിയുടെയും പ്രിന്‍സിപ്പലായും സേവനം ചെയ്തുവരുന്ന ഉസ്താദ് വിശ്രമമില്ലാതെ ദീനീപ്രബോധന രംഗത്ത് ജ്വലിച്ച് നില്‍ക്കുകയാണ്.
മഹല്ലുകളിലും വ്യക്തികള്‍ക്കിടയിലും ഉണ്ടാവുന്ന പ്രശ്‌നങ്ങളിലും തര്‍ക്കങ്ങളിലും ഇടപെട്ട് പരിഹാരം ഉണ്ടാക്കുന്നതിലും ഉസ്താദിന്റെ ഉപദേശങ്ങളും ഇടപെടലുകളും എടുത്തു പറയേണ്ടതാണ്.
ഈ മാസം 15ന് ഉച്ചക്ക് രണ്ടിന് സമസ്ത ജില്ലാ കാര്യാലയത്തില്‍ നടക്കുന്ന ചടങ്ങ് സമസ്തയുടെയും പോഷക ഘടകങ്ങളുടെയും പ്രവര്‍ത്തകരും മഹല്ല് മദ്‌റസ മാനേജ്‌മെന്റ് പ്രതിനിധികളും സംബന്ധിക്കും. ആലോചനാ യോഗത്തില്‍ വി മൂസക്കോയ മുസ്‌ലിയാര്‍ അധ്യക്ഷനായി.
ആനമങ്ങാട് അബൂബക്കര്‍ മുസ്‌ലിയാര്‍, എം.എം ഇമ്പിച്ചിക്കോയ മുസ്‌ലിയാര്‍, ടി.സി അലി മുസ്‌ലിയാര്‍, ഇബ്‌റാഹീം ഫൈസി വാളാട്, ഇബ്‌റാഹീം ഫൈസി പുഴക്കംവയല്‍, സി.കെ അബ്ദുല്‍ മജീദ് ദാരിമി, കെ.വി ജഅ്ഫര്‍ ഹൈതമി, നിസാര്‍ ദാരിമി, എം.എ ഇസ്മായില്‍ ദാരിമി, അബ്ദുറഹ്മാന്‍ ഫൈസി, മുഹമ്മദ് കുട്ടി ഫൈസി മാനാഞ്ചിറ, സി ജഅ്ഫര്‍ സ്വാദിഖ് ഫൈസി സംസാരിച്ചു. എസ് മുഹമ്മദ് ദാരിമി സ്വാഗതം പറഞ്ഞു.