ന്യൂഡല്‍ഹി: പ്രധാനമന്ത്രി നരേന്ദ്രമോദിയുടെ പരിഹാസത്തിനു തിരിച്ചടി നല്‍കി കോണ്‍ഗ്രസ് ഉപാധ്യക്ഷന്‍ രാഹുല്‍ഗാന്ധി. അന്യരുടെ കുളിമുറിയില്‍ ഒളിഞ്ഞുനോക്കുന്ന പരിപാടിയില്‍ മാത്രമാണ് പ്രധാനമന്ത്രി നരേന്ദ്രമോദിക്ക് താല്‍പര്യമെന്ന് രാഹുല്‍ പറഞ്ഞു. ലഖ്‌നോയില്‍ അഖിലേഷ് യാദവിനൊപ്പം വാര്‍ത്താസമ്മേളനത്തില്‍ സംസാരിക്കുകയായിരുന്നു രാഹുല്‍. കഴിഞ്ഞദിവസം ഉത്തര്‍പ്രദേശില്‍ ബി.ജെ.പിയുടെ തെരഞ്ഞെടുപ്പു പ്രചാരണപരിപാടിക്കിടെ ഗൂഗിളില്‍ തിരഞ്ഞാല്‍ കൂടുതല്‍ തമാശ കാണുക രാഹുലിനെ കുറിച്ചായിരിക്കുമെന്ന് മോദി പരിഹസിച്ചിരുന്നു. ഇതിനു പുറമെ പാര്‍ലമെന്റില്‍ നടത്തിയ പ്രസംഗത്തില്‍ മഴക്കോട്ടിട്ട് കുളിക്കുന്ന കല മുന്‍പ്രധാനമന്ത്രി മന്‍മോഹന്‍ സിങ്ങില്‍ നിന്ന് പഠിക്കണമെന്നും മോദി പറഞ്ഞിരുന്നു.