മാനന്തവാടി: കമ്മന മംഗളോദയം വായനശാലയുടെ അറുപതാം വാര്‍ഷികാഘോഷ പരിപാടികള്‍ ഈമാസം 13ന് ആരംഭിക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
ഒരു വര്‍ഷം നീണ്ടുനില്‍ക്കുന്ന പരിപാടികളുടെ ഉദ്ഘാടനം ഒ.എന്‍.വിയുടെ ഒന്നാം ചരമവാര്‍ഷിക ദിനമായ 13ന് വൈകുന്നേരം ആറിന് പ്രശസ്ത ഗായകന്‍ വി.ടി മുരളി നിര്‍വഹിക്കും. ഒ.എന്‍.വിയുടെ കവിതകളും ഗാനങ്ങളും കോര്‍ത്തിണക്കിയ സംഗീത നിശയും നടക്കും.
1954ല്‍ പുലിക്കാട് എം.എല്‍.പി സ്‌കൂളില്‍ മംഗളോദയം കലാസമിതി എന്ന പേരില്‍ ആരംഭിച്ച വായനശാലക്ക് 2013ല്‍ ജില്ലയിലെ മികച്ച വായനശാലക്കുള്ള പോക്കര്‍ മാസ്റ്റര്‍ പുരസ്‌ക്കാരവും ലഭിച്ചിരുന്നു.
നിലവില്‍ വായനശാലയില്‍ ആയിരത്തിലധികം അംഗങ്ങളുണ്ട്. ഒരു വര്‍ഷം നീണ്ട് നില്‍ക്കുന്ന പരിപാടികളില്‍ കലാഭവന്‍ മണി അനുസ്മരണം, സര്‍ഗോത്സവം, പ്രതിഭകളെ ആദരിക്കല്‍, കലാകായിക മത്സരങ്ങള്‍, സെമിനാറുകള്‍, ഗോത്രകലാമേള, കവിയരങ്ങ്, ചലചിത്രമേള തുടങ്ങി വൈവിധ്യമാര്‍ന്ന പരിപാടികളും നടക്കും. വാര്‍ത്താസമ്മേളനത്തില്‍ പി.കെ സുധീര്‍, എം.യു തോമസ്, എന്‍.ടി സത്യപ്രകാശ്, അഖില തോമസ് എന്നിവര്‍ പങ്കെടുത്തു.