കൊണ്ടോട്ടി: നെടിയിരുപ്പ് എന്‍.എച്ച് കോളനി, ചെരുപ്പടി പ്രദേശങ്ങളിലെ പനിബാധിതരെ ടി.വി ഇബ്രാഹീം എം.എല്‍.എയുടെ നേതൃത്വത്തിലുളള സംഘം സന്ദര്‍ശിച്ചു. 200ല്‍ പരം ആളുകള്‍ക്ക് ഇതിനകം പനിബാധിതരായി സമീപത്തെ ആശുപത്രികളില്‍ ചികിത്സ നേടിയിട്ടുണ്ട്. കൊണ്ടോട്ടി താലൂക്ക് ആശുപത്രി, മഞ്ചേരി കോഴിക്കോട് മെഡിക്കല്‍ കോളജ്, കൊണ്ടോട്ടി സി.എച്ച്.സി എന്നിവിടങ്ങളിലാണ് ചികിത്സതേടി എത്തിയിട്ടുള്ളത്.
പലയിടത്തും ഒരു വീട്ടിലെ നാലുപേര്‍ പനി ബാധിച്ചവരായുണ്ട്. കഴിഞ്ഞ മാസം പനി ബാധിച്ച സുജിഷ(25) മരണമടഞ്ഞിരുന്നു. ഇവരുടെ വീടും ആശുപത്രിയിലായ പനി ബാധിതരെയും സന്ദര്‍ശിച്ചു. തുടര്‍ന്ന് പട്ടികജാതി വകുപ്പ് മന്ത്രി എ.കെ ബാലന്‍, ജില്ലാ കലക്ടര്‍, ഡി.എം.ഒ എന്നിവരുമായി എം.എല്‍.എ ബന്ധപ്പെട്ടു. മന്ത്രി അടിയന്തര നടപടികള്‍ സ്വീകരിക്കാമെന്ന് ഉറപ്പ് നല്‍കിയതായി എം.എല്‍.എ അറിയിച്ചു. അശ്‌റഫ് മടാന്‍, അഡ്വ. കെ.കെ ഷാഹുല്‍ ഹമീദ്, കെ.എ മുന്നാസ്, ശങ്കരനാരായണന്‍, സി മുഹമ്മദ് റാഫി കോതേരി നീലകണ്ഠന്‍, വി സുബ്രമണ്യന്‍, പുതിയറക്കല്‍ സലിം, കെ.കെ ഉനൈസ് തുടങ്ങിയവരും സംബന്ധിച്ചു.