കയ്പമംഗലം: പ്രതിരോധ കുത്തിവെപ്പ് എടുക്കാത്ത കുട്ടികളില്‍ വില്ലന്‍ ചുമ പടരുന്നതായി ആരോഗ്യ വിഭാഗം റിപ്പോര്‍ട്ട്. കയ്പമംഗലം പഞ്ചായത്തില്‍ കൊപ്രക്കളം സലഫി നഗറില്‍ ഒരു വീട്ടിലെ മൂന്ന് കുട്ടികള്‍ക്കാണ് വില്ലന്‍ ചുമ ബാധിച്ച് തൃശൂര്‍ മെഡിക്കല്‍ കോളജ് ആശുപത്രിയില്‍ ചികിത്സയിലുള്ളത്. എട്ട് മാസം, രണ്ടര വയസ്, അഞ്ച് വയസ് പ്രായമുള്ള ഈ കുട്ടികള്‍ക്ക് യാതൊരു വിധത്തിലുള്ള പ്രതിരോധ കുത്തിവെപ്പുകളും എടുത്തിട്ടില്ലെന്ന് ആരോഗ്യ വകുപ്പ് ഉദ്യോഗസ്ഥര്‍ സാക്ഷ്യപ്പെടുത്തുന്നു.
കഴിഞ്ഞ മാസങ്ങളില്‍ ആരോഗ്യ വകുപ്പ് നടത്തിയ മിഷന്‍ ഇന്ദ്രധല്‍സ് എന്ന പ്രത്യേക വാക്‌സിന്‍ വിതരണ പരിപാടിയില്‍ പോലും ഇവര്‍ പങ്കെടുത്തില്ല. ആരോഗ്യ വകുപ്പ് പ്രവര്‍ത്തകര്‍ നിരവധി തവണ ഉപദേശ നിര്‍ദ്ദേശങ്ങള്‍ നല്‍കിയിട്ടും ചെവി കൊള്ളാതെയുള്ള ഇവരുടെ പ്രതികരണം ആശങ്കാ ജനകമായിരുന്നുവെന്ന് ആരോഗ്യ വകുപ്പ് പ്രവര്‍ത്തകര്‍ പറയുന്നു.
പ്രധാനമായും അഞ്ചു വയസിന് താഴെയുള്ള കുട്ടികള്‍ക്കാണ് കൂടുതലായി വില്ലന്‍ ചുമ കണ്ടു വരുന്നത്. ശക്തിയേറിയ ചുമ, പനി, മൂക്കൊലിപ്പ്, തുമ്മല്‍ എന്നിവയാണ് മുഖ്യ ലക്ഷണങ്ങള്‍. തൊണ്ട, മൂക്ക് എന്നിവയിലൂടെയുള്ള സ്രവത്തിലൂടെയാണ് രോഗം പകരുന്നത്. ഈ രോഗത്തെ പ്രതിരോധിക്കാനുള്ള വാക്‌സിനാണ് ഒന്നര, രണ്ടര, മൂന്നര മാസങ്ങളില്‍ ലിക്വിഡ് പെന്റാവാലന്റ് വാക്‌സിന്‍ എന്ന പേരില്‍ നല്‍കുന്നത്. ഈ കുത്തിവെപ്പിലൂടെ അഞ്ചു രോഗങ്ങളെ പ്രതിരോധിക്കാനാകുന്നു.
 ഇതില്‍ ഒന്ന് വില്ലന്‍ ചുമയെന്ന ഈ രോഗമാണ്. യഥാസമയങ്ങള്‍ ആരോഗ്യ വകുപ്പിന്റെ നിര്‍ദ്ദേശപ്രകാരം പ്രധിരോധ കുത്തിവെപ്പുകള്‍ എടുക്കുന്നതിലൂടെ ഈ രോഗങ്ങളുടെ പകര്‍ച്ച തടയാനാകുമെന്ന് ആരോഗ്യ വിഭാഗം പറയുന്നു. കൃത്യമായ ശീതീകരണ സംവിധാനത്തില്‍ സൂക്ഷിച്ച് കാര്യക്ഷമമായി നല്‍കുന്ന പ്രതിരോധ കുത്തിവെപ്പ് പരിപാടികള്‍ ജനങ്ങളുടെ ആരോഗ്യ സംരക്ഷണമാണ് ലക്ഷ്യമിടുന്നതെന്നും ആരോഗ്യ വകുപ്പ് ഉദ്യോഗസ്ഥര്‍ പറഞ്ഞു.