മലപ്പുറം: ജനതാദള്‍ യു ഒപ്പമുണ്ടായിരുന്നതുകൊണ്ട് യു.ഡി.എഫിന് നേട്ടവും തങ്ങള്‍ക്ക് നഷ്ടവുമാണുണ്ടായതെന്ന് സംസ്ഥാന പ്രസിഡന്റ് എംപി. വീരേന്ദ്രകുമാര്‍. മലപ്പുറം ജില്ലാ കൗണ്‍സില്‍ യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

തങ്ങളില്ലായിരുന്നെങ്കില്‍ കഴിഞ്ഞ തവണ യു. ഡി.എഫിന് ഭരണം ലഭിക്കുമായിരുന്നില്ല. ലോക്‌സഭയിലേക്ക് നടന്ന തെരഞ്ഞെടുപ്പില്‍ യു.ഡി.എഫ് വിജയത്തിന് ജനതാദള്‍ നിര്‍ണായകമായിരുന്നു. മുസ്‌ലിം ലീഗിനും തങ്ങളെക്കൊണ്ട് നേട്ടമാണുണ്ടായത്.

കോഴിക്കോട് കുറ്റ്യാടിയില്‍ ലീഗ് നിയമസഭയിലേക്ക് വിജയിച്ചത് തങ്ങളുടെ വോട്ടുകൊണ്ടാണ്. അടുത്ത നിയമസഭാ തെരഞ്ഞെടുപ്പില്‍ കുറ്റ്യാടിയില്‍ ലീഗ് വിജയിച്ചാല്‍ താന്‍ ജെ.ഡി.യു പ്രസിഡന്റ് സ്ഥാനം രാജിവെക്കുമെന്ന് വീരേന്ദ്രകുമാര്‍ പറഞ്ഞു.