ബംഗളൂരു: കര്‍ണാടകയില്‍ നിയമസഭാ തെരഞ്ഞെടുപ്പ് നടക്കാനിരിക്കെ, ബി.ജെ.പിയിലെ മുന്‍മന്ത്രി ബി.എസ് ആനന്ദ് സിങ് കോണ്‍ഗ്രസില്‍ ചേര്‍ന്നു. നിയമസഭാംഗത്വത്തില്‍ നിന്നും രാജിവച്ചാണ് അദ്ദേഹം കോണ്‍ഗ്രസില്‍ ചേര്‍ന്നത്.

ആനന്ദ് സിങിനൊപ്പം നിരവധി അണികളും കോണ്‍ഗ്രസില്‍ ചേര്‍ന്നിട്ടുണ്ട്. ഇവര്‍ മുഖ്യമന്ത്രി സിദ്ധരാമയ്യയുടെ സാന്നിധ്യത്തില്‍ കെ.പി.സി.സി ആസ്ഥാനത്തെത്തിയാണ് കോണ്‍ഗ്രസില്‍ ചേര്‍ന്നത്. പാര്‍ട്ടിയിലെ തര്‍ക്കങ്ങളും ബഹളങ്ങളുമാണ് രാജിവയ്ക്കാന്‍ കാരണമെന്ന് അദ്ദേഹം പറഞ്ഞു.

ജില്ലയിലെ ഒന്‍പതു സീറ്റുകളിലും വിജയിക്കുന്നതിനു വേണ്ടി കോണ്‍ഗ്രസിനൊപ്പം പ്രവര്‍ത്തിക്കുമെന്ന് ആനന്ദ് സിങ് പ്രതികരിച്ചു. ബെല്ലാരി ജില്ലയിലെ വിജയനഗര മണ്ഡലത്തില്‍ നിന്നാണ് ആനന്ദ് സിങ് വിജയിച്ചിരുന്നത്.