ന്യൂഡല്‍ഹി: രാജസ്ഥാന്‍ തെരഞ്ഞെടുപ്പ് പരാജയത്തില്‍ ബി.ജെ.പിയെ പരിഹസിച്ച് ശിവസേന. ഗുജറാത്ത് തെരഞ്ഞെടുപ്പ് ട്രെയിലറായിരുന്നെങ്കില്‍ രാജസ്ഥാനിലേത് ഇടവേളയാണെന്നും യഥാര്‍ഥ ചിത്രം 2019ല്‍ പുറത്തു വരുമെന്നുമെന്നുമാണ് ശിവസേനയുടെ പരഹാസം.

'ഗുജറാത്ത് തിരഞ്ഞെടുപ്പ് ഒരു ട്രെയിലറായിരുന്നു. രാജസ്ഥാന്‍ ഉപതിരഞ്ഞെടുപ്പ് ഇടവേളയാണ്. യഥാര്‍ഥ ചിത്രം 2019 ല്‍ കാട്ടിത്തരാം'ശിവസേന നേതാവ് സഞ്ജയ് റാവത്ത് പറഞ്ഞു. ഒറ്റയ്ക്ക് മത്സരിക്കുമെന്ന തീരുമാനത്തില്‍ നിന്ന് പിന്നാക്കം പോകുന്ന പ്രശ്‌നമുദിക്കുന്നില്ല. ഒരിക്കല്‍ അമ്പ് വില്ലില്‍ നിന്ന് പുറപ്പെട്ടാല്‍ പിന്നെ തിരിച്ചുവരില്ലല്ലോ'- അദ്ദേഹം പറഞ്ഞു.

ജയ്റ്റിലി അവതരിപ്പിച്ച ബജറ്റ് ഗംഭീരമാണ്, പക്ഷേ കടലാസിലാണെന്ന് മാത്രം. കര്‍ഷകര്‍ ആത്മഹത്യ ചെയ്യുന്നു. ബജറ്റില്‍ പറഞ്ഞിട്ടുള്ളതൊക്കെ എങ്ങനെ പ്രാവര്‍ത്തികമാകുമെന്ന് ഇപ്പോള്‍ പറയാനാവില്ലെന്നും അദ്ദേഹം കൂട്ടിച്ചേര്‍ത്തു.

2019 ലെ തെരഞ്ഞെടുപ്പില്‍ ഒറ്റയ്ക്ക് മത്സരിക്കുമെന്ന് പ്രഖ്യാപിച്ചതിന് പിന്നാലെയാണ് ബി.ജെ.പിക്കെതിരെ വിമര്‍ശനവുമായി ശിവസേന രംഗത്തെത്തിയിരിക്കുന്നത്.