ന്യൂഡല്‍ഹി: മുതിര്‍ന്ന നേതാവ് വി.എസ് അച്യുതാനന്ദന്‍ എം.എല്‍.എയുടെ പദവി സംബന്ധിച്ച് ഇന്ന് ചേര്‍ന്ന പൊളിറ്റ്ബ്യൂറോയില്‍ ധാരാണയായില്ല. എന്നാല്‍ വി.എസിന് ഉചിതമായ പദവി നല്‍കണമെന്ന കാര്യത്തില്‍ തീരുമാനമായി. വി.എസിന് ക്യാബിനറ്റ് റാങ്കോടെ പദവി നല്‍കും. സ്വതന്ത്ര അധികാരമുണ്ടാകും.വി.എസിന് മുഖ്യമന്ത്രിക്ക് റിപ്പോര്‍ട്ട് ചെയ്യേണ്ടിവരില്ല. നിയമസാധുത പരിശോധിച്ച് ശേഷമാകും അന്തിമ തീരുമാനം. ഭാവിനടപടികള്‍ കേന്ദ്രകമ്മിറ്റിയില്‍ തീരുമാനിക്കും.

എന്നാല്‍ വി.എസിന്റെ പദവി സര്‍ക്കാരില്‍ രണ്ട് അധികാര കേന്ദ്രങ്ങള്‍ സൃഷ്ടിക്കാന്‍ ഇടവരരുതെന്നും നിര്‍ദ്ദേശമുണ്ടായി.

ഏറെ വിവാദം സൃഷ്ടിച്ച വി.എസിന്റെ കുറിപ്പ് ജനറല്‍ സെക്രട്ടറി സീതാറാം യെച്ചൂരി പി.ബിയില്‍ വെച്ചു.

കുറിപ്പ് വിവാദമായതോടെ വി.എസ് പദവി ആവശ്യപ്പെട്ട് തനിക്ക് കുറിപ്പ് തന്നതായി യെച്ചൂരി കഴിഞ്ഞ ദിവസം തുറന്നു പറഞ്ഞിരുന്നു. ക്യാബിനറ്റ് റാങ്കോടെ സര്‍ക്കാരിന്റെ ഉപദേശകന്‍, എല്‍.ഡി.എഫ് ചെയര്‍മാന്‍ എന്നീ പദവികളാണ് വി.എസ് കുറിപ്പിലൂടെ ആവശ്യപ്പെട്ടത്. ഈ കുറിപ്പ് സംബന്ധിച്ചുള്ള പദവി നല്‍കുന്ന കാര്യങ്ങളെക്കുറിച്ചാണ് ചര്‍ച്ച നടക്കുന്നത്. പദവി ഏതെന്ന തീരുമാനം കൂടുതല്‍ ചര്‍ച്ചകള്‍ക്കു ശേഷമേ ഉണ്ടാവുകയുള്ളു.

എല്‍.ഡി.എഫ് മന്ത്രിസഭയുടെ സത്യപ്രതിജ്ഞാ ചടങ്ങിനിടെയാണ് വി.എസിന്റെ കുറിപ്പ് വിവാദമായത്.