റിയാദ്‌: കഴിഞ്ഞ ഏതാനും ദിവസങ്ങളായി സഊദിയുടെ വിവിധ ഭാഗങ്ങളില്‍ കനത്ത മഴ തുടരുന്നു. തലസ്ഥാന നഗരിയായ റിയാദ് , അബഹ, അസീര്‍, ദമാം തുടങ്ങിയ പ്രവിശ്യകളില്‍ ഇതിനകം വെള്ളത്തിനടിയിലായി.

കനത്ത മഴയില്‍ വെള്ളം കയറിയതിനെ തുടര്‍ന്ന് കനത്ത നാശ നഷ്ടങ്ങളാണ് വിവിധയിടങ്ങളില്‍ നിന്നായി റിപ്പോര്‍ട്ട് ചെയ്തിട്ടുള്ളത്. ഇടിയോടുകൂടിയാണ് കനത്ത മഴ തുടരുന്നത്. ചിലയിടങ്ങളില്‍ മഞ്ഞു വീഴ്ച്ചയും തുടരുന്നുണ്ട്. റോഡുകള്‍ ഒലിച്ചു പോകുകയും വാഹനങ്ങള്‍ വെള്ളത്തിനടിയിലാകുകയും ചെയ്തു .

അബഹയില്‍ കാര്‍ ഒഴുക്കില്‍ പെട്ട് വിദേശിയെയും സൗദി ബാലനെയും കാണാതായി. ഇരുവര്‍ക്കും വേണ്ടി തിരച്ചില്‍ തുടരുകയാണെന്ന് സിവില്‍ ഡിഫന്‍സ് അറിയിച്ചു. അസീര്‍ പ്രവിശ്യയില്‍ വിദ്യാഭ്യാസ സ്ഥാപനങ്ങള്‍ക്ക് അവധി പ്രഖ്യാപിച്ചു. വ്യാഴാഴ്ച വൈകിട്ടു മുതല്‍ താപനില പടിപടിയായി കുറയുന്നതിനും സാധ്യതയുണ്ട്.

അസീസിയയില്‍ മേല്‍ക്കൂര തകര്‍ന്ന് മലയാളികള്‍ താമസിച്ച റൂമിന്റെ ഫര്‍ണിച്ചര്‍ അടക്കം മുഴുവന്‍ സാധനങ്ങളും നശിച്ചു . ഇവര്‍ പുറത്ത് ആയിരുന്നതിനാല്‍ വന്‍ദുരന്തം ഒഴിവായി. അബഹ ദര്‍ബ് റോഡിലും, അബ്ഹമൊഹായില്‍, അബ്ഹ ത്വാഇഫ് റോഡിലും മലയിടിഞ്ഞ് ഗതാഗതം തടസ്സപ്പെട്ടു.

മഴ സാധ്യത കണക്കിലെടുത്ത് ട്രാഫിക്, റെഡ്ക്രസന്റ് എന്നിവക്ക് കീഴില്‍ ആവശ്യമായ ഒരുക്കങ്ങള്‍ നേരത്തെ പൂര്‍ത്തിയാക്കിയിട്ടുണ്ട്. അസീറില്‍ അടിയന്തിര ആവശ്യങ്ങള്‍ക്കാല്ലാതെ വീടുകളില്‍ നിന്നും പുറത്തിറങ്ങരുതെന്ന് സിവില്‍ ഡിഫന്‍സ് അറിയിച്ചിട്ടുണ്ട്.

കിഴക്കന്‍ പ്രവിശ്യകളിലും കനത്ത മഴയാണ് കഴിഞ്ഞ ദിവസങ്ങളില്‍ ഉണ്ടായത്. കഴിഞ്ഞ ഏതാനും ദിവസങ്ങളായി തുടരുന്ന മഴ കാരണം റോഡുകള്‍ പലതും വെള്ളത്തിലാണ്. പലയിടങ്ങളിലും റോഡുകളിലെ വെള്ളം ഒഴിവാക്കാന്‍ മുസിപ്പാലിറ്റി അധികൃതര്‍ ശ്രമം തുടങ്ങിയിട്ടുണ്ട്. സഊദി അരാംകോയുടെ വാതക പൈപ് ലൈനുകളില്‍ വാത ചോര്‍ച്ചയും കണ്ടെത്തിയിട്ടുണ്ട്.