മാഡ്രിഡ്: കരുത്തരായ സെവിയ്യ സ്പാനിഷ് കിങ്‌സ് കപ്പ് പോരാട്ടത്തിന്റെ ഫൈനലില്‍. ഇരു പാദ സെമിയില്‍ ലെഗാനസിനെ 3-1ന് തകര്‍ത്താണ് സെവിയ്യ കലാശപ്പോരിലേക്ക് കടന്നത്. ആദ്യ പാദത്തില്‍ 1-1ന് സമനില വഴങ്ങിയ സെവിയ്യ സ്വന്തം തട്ടകത്തില്‍ അരങ്ങേറിയ രണ്ടാം പാദ പോരാട്ടത്തില്‍ 2-0ത്തിന് വിജയിച്ചാണ് സീറ്റുറപ്പിച്ചത്. ബാഴ്‌സലോണ- വലന്‍സിയ പോരാട്ടത്തിലെ വിജയികളാകും ഫൈനലില്‍ സെവിയ്യയുടെ എതിരാളികള്‍.
2009-10 സീസണില്‍ കിങ്‌സ് കപ്പില്‍ മുത്തമിട്ട ശേഷം എട്ട് വര്‍ഷമായി സെവിയ്യക്ക് ചാംപ്യന്‍മാരാകാന്‍ സാധിച്ചിട്ടില്ല. ആറാം കിരീടം നേടാനുള്ള അവസരമാണ് അവര്‍ക്ക് ഇപ്പോള്‍ കൈവന്നിരിക്കുന്നത്.
ഒന്‍പതാം തവണയാണ് ടീം ഫൈനലിലേക്ക് മുന്നേറുന്നത്. അഞ്ച് തവണ കിരീടം നേടിയപ്പോള്‍ മൂന്ന് തവണ ഫൈനലില്‍ തോല്‍വി വഴങ്ങി. രണ്ട് വര്‍ഷം മുന്‍പ് ബാഴ്‌സലോണയോട് ഫൈനലില്‍ കീഴടങ്ങേണ്ടി വന്നതാണ് അവസാന കലാശപ്പോരാട്ടം.