ഇംഫാല്‍: മണിപ്പൂരിലെ തൗബാല്‍ നിയോജകമണ്ഡലത്തില്‍ മത്സരിക്കാന്‍ ഇറോം ശര്‍മിള നാമനിര്‍ദേശ പത്രിക സമര്‍പ്പിച്ചു. ഇന്നലെ രാവിലെ 11ന് തൗബാല്‍ മണ്ഡലത്തിലെ വരണാധികാരിയായ ജില്ലാ കലക്ടര്‍ക്കു മുന്‍പാകെയാണ് പത്രിക സമര്‍പ്പിച്ചത്. ശര്‍മിള പത്രികാസമര്‍പ്പണത്തിനെത്തുന്നതിന് തൊട്ടു മുന്‍പ് മുഖ്യമന്ത്രി ഇബോബി സിങും ഇതേ മണ്ഡലത്തില്‍ മത്സരിക്കുന്നതിനായി നാമനിര്‍ദേശ പത്രിക സമര്‍പ്പിച്ചു.
കഴിഞ്ഞ പതിനഞ്ചുവര്‍ഷമായി തൗബാല്‍ മണ്ഡലത്തെ പ്രതിനിധീകരിക്കുന്നത് മുഖ്യമന്ത്രി ഇബോബി സിങാണ്. തന്റെ തെരഞ്ഞെടുപ്പ് ചിഹ്നമായ വിസില്‍ ഊതിയാണ് ശര്‍മിള മുഖ്യമന്ത്രിയെ യാത്രയാക്കിയത്. ഇതിനിടെ തെരഞ്ഞെടുപ്പില്‍ നിന്നും പിന്മാറാന്‍ ഇറോം ശര്‍മിളക്ക് 36 കോടി രൂപ വാഗ്ദാനം ചെയ്ത സംഭവം ബി.ജെ.പിയെ കടുത്ത സമ്മര്‍ദ്ധത്തിലാക്കിയിട്ടുണ്ട്.