ദോഹ: മഴ കാരണം സമയക്രമം തെറ്റിയ ഖത്തര്‍ ടോട്ടല്‍ ഓപണ്‍ ടെന്നീസ് മത്സരത്തില്‍ പരാഗ്വെയുടെ മോണിക്ക പ്യുഗ്, സ്ലൊവാക്യയുടെ ഡൊമിനിക സിബുല്‍കോവ, ചൈനയുടെ സാങ് ഷുവെ എന്നിവര്‍ ക്വാര്‍ട്ടറിലെത്തി. ഖലീഫ ടെന്നീസ് ആന്‍ഡ് സ്‌ക്വാഷ് കോംപ്ലക്‌സില്‍ മൂന്നാം ദിനത്തിലും വില്ലനായി മഴയെത്തി. ഇന്നലെ രാവിലെയും ഉച്ചയ്ക്കു ശേഷവുമായാണ് മത്സരങ്ങള്‍ നടന്നത്.
സ്‌പെയിനിന്റെ ലോക ഏഴാം നമ്പര്‍ താരവും ടൂര്‍ണമെന്റിലെ അഞ്ചാംസീഡുമായ ഗാര്‍ബിനെ മുഗുരുസ പുറത്തായത് ശ്രദ്ധേയമായി. ചൈനയുടെ ലോക 31ാം നമ്പര്‍ താരം സാങ് ഷുവെയാണ് സ്പാനിഷ് താരത്തെ അട്ടിമറിച്ചത്. സ്‌കോര്‍ 7-6, 3-6, 7-5. റഷ്യയുടെ അനസ്താസ്യ പവ്‌ലുചെങ്കോവയെ മൂന്നു സെറ്റ് നീണ്ട പോരാട്ടത്തില്‍ മറികടന്നാണ് സ്ലൊവാക്യയുടെ ലോക അഞ്ചാം നമ്പര്‍ താരം സിബുല്‍കോവ ക്വാര്‍ട്ടറില്‍ സ്ഥാനം ഉറപ്പിച്ചത്. ഡബിള്‍സില്‍ ടോപ്‌സീഡ് സ്വിറ്റ്‌സര്‍ലന്‍ഡിന്റെ മാര്‍ട്ടിന ഹിംഗിസും ചൈനീസ് തായ്‌പേയിയുടെ യുങ് ജാന്‍ ചാനും ചേര്‍ന്ന സഖ്യം ക്വാര്‍ട്ടറിലെത്തി. ഹോളണ്ടിന്റെ കികി ബെര്‍ട്ടന്‍സ് സ്വീഡന്റെ യോഹന്ന ലാര്‍സന്‍ സഖ്യത്തെ നേരിട്ടുള്ള സെറ്റുകള്‍ക്കാണ് പരാജയപ്പെടുത്തിയത്.