ജിദ്ദ: മക്ക ബസ് പദ്ധതി വേഗത്തില്‍ പൂര്‍ത്തിയാക്കാന്‍ ഗവര്‍ണറും വികസന അതോറിറ്റി ചെയര്‍മാനുമായ അമീര്‍ ഖാലിദ് അല്‍ ഫൈസല്‍ നിര്‍ദേശം നല്‍കിയതായി വികസന അതോറിറ്റി ജനറല്‍ സെക്രട്ടറി ഡോ. ഹിശാം അല്‍ഫാലിഹ് അറിയിച്ചു.
പദ്ധതിക്ക് 302 ബില്യണ്‍ റിയാലാണ് ചെലവ് കണക്കാക്കുന്നത്. 10 വര്‍ഷംകൊണ്ട് പദ്ധതി പൂര്‍ത്തിയാകും.
ബസുകളുടെ ഇറക്കുമതി, ഓപറേഷന്‍, അറ്റകുറ്റപ്പണി, റോഡുകള്‍ ഒരുക്കല്‍ എന്നിവ ഇതിലുള്‍പ്പെടും. 450 ബസ് സ്റ്റേഷനുകളും ഗോഡൗണുകളും വര്‍ക്‌ഷോപ്പുകളും പരിശീലന പരിപാടികളും പദ്ധതിക്ക് കീഴിലുണ്ടാവും. 12 റൂട്ടുകളിലായി 500 ബസുകള്‍ ഉള്‍ക്കൊള്ളുന്നതാണ് പദ്ധതി.
ബസുകള്‍ ഉയര്‍ന്ന നിലവാരത്തിലുള്ളതായിരിക്കും. അഞ്ചു ട്രാക്കുകളില്‍ എക്‌സ്പ്രസ് ബസുകളും ബാക്കിയുള്ളതില്‍ ലോക്കല്‍ സര്‍വിസ് ബസുകളുമായിരിക്കും ഓടുക.
രണ്ടാംഘട്ടത്തില്‍ ബസിന്റെ സേവനം വിദ്യാര്‍ഥികള്‍ക്കും ലഭ്യമാക്കും. പദ്ധതിവന്നാല്‍ 1,500 സ്വദേശികള്‍ക്ക് തൊഴില്‍ ലഭിക്കുമെന്നും അദ്ദേഹം അറിയിച്ചു.