ധാക്ക: ബംഗ്ലാദേശിനെ അവരുടെ നാട്ടില്‍ നാണംകെട്ട തോല്‍വിയിലേക്ക് തള്ളിയിട്ട് ശ്രീലങ്ക രണ്ട് ടെസ്റ്റുകളടങ്ങിയ പരമ്പര 1-0ത്തിന് നേടി. ആദ്യ ടെസ്റ്റ് സമനിലയില്‍ അവസാനിച്ചിരുന്നു. രണ്ടാം ക്രിക്കറ്റ് ടെസ്റ്റിന്റെ മൂന്നാം ദിനത്തില്‍ തന്നെ ലങ്ക 215 റണ്‍സിന് മികച്ച വിജയം പിടിച്ചെടുത്തു. സ്‌കോര്‍: ശ്രീലങ്ക ഒന്നാം ഇന്നിങ്‌സ് 222, രണ്ടാം ഇന്നിങ്‌സ് 226 റണ്‍സ്. ബംഗ്ലാദേശ് ഒന്നാം ഇന്നിങ്‌സ് 110, രണ്ടാം ഇന്നിങ്‌സ് 123 റണ്‍സ്.
എട്ട് വിക്കറ്റ് നഷ്ടത്തില്‍ 200 റണ്‍സെന്ന നിലയില്‍ മൂന്നാം ദിനം ബാറ്റിങ് തുടങ്ങിയ ലങ്കയ്ക്ക് 26 റണ്‍സ് ചേര്‍ക്കുന്നതിനിടെ ശേഷിച്ച രണ്ട് വിക്കറ്റുകള്‍ കൂടി നഷ്ടമായി രണ്ടാം ഇന്നിങ്‌സ് 226 റണ്‍സില്‍ അവസാനിപ്പിക്കേണ്ടി വന്നു. ബംഗ്ലാദേശിന് വിജയ ലക്ഷ്യം 339 റണ്‍സ്.
കൂറ്റന്‍ വിജയത്തിലേക്ക് ബാറ്റേന്തിയ ആതിഥേയരെ വെറും 123 റണ്‍സില്‍ പുറത്താക്കി ലങ്ക മൂന്നാം ദിനത്തില്‍ തന്നെ മത്സരം അവസാനിപ്പിച്ച് വിജയം സ്വന്തമാക്കുകയായിരുന്നു. അഞ്ച് വിക്കറ്റുകള്‍ വീഴ്ത്തിയ അഖില ധനഞ്ജയ, നാല് വിക്കറ്റെടുത്ത രംഗണ ഹെറാത്ത് എന്നിവരുടെ മാരക ബൗളിങിന് മുന്നില്‍ ബംഗ്ലാ ബാറ്റിങ് നിര ചീട്ടുകൊട്ടാരം പോലെ തകര്‍ന്നടിഞ്ഞു.
മൊമിനുല്‍ ഹഖ് (33), മുഷ്ഫിഖര്‍ റഹീം (25) എന്നിവര്‍ മാത്രമാണ് പിടിച്ചുനിന്നത്. രണ്ടാം ഇന്നിങ്‌സില്‍ 70 റണ്‍സെടുത്ത് പുറത്താകാതെ നിന്ന് ശ്രീലങ്കന്‍ നിരയ്ക്ക് കരുത്തായ റോഷന്‍ സില്‍വയാണ് കളിയിലെ താരം.