ഭോപ്പാല്‍: മധ്യപ്രദേശിലെ ഇന്‍ഡോറില്‍ ശസ്ത്രക്രിയക്കിടെ ഓക്‌സിജനു പകരം നൈട്രസ് ഓക്‌സൈഡ് നല്‍കിയതിനെ തുടര്‍ന്ന് കുട്ടി മരിച്ചു. മറ്റൊരു കുട്ടി ഗുരുതരാവസ്ഥയിലാണ്. ഇന്‍ഡോറിലെ സര്‍ക്കാര്‍ ആതുരാലയമായ മഹാരാജ യശ്വന്ത്‌റാവു ആശുപത്രിയിലാണ് ദാരുണമായ സംഭവം.ആയുഷ് എന്ന എട്ടു വയസുകാരനാണ് മരിച്ചത്. 18 മാസം പ്രായമായ രാജ്‌വീര്‍ ഗുരുതരാവസ്ഥയില്‍ കഴിയുകയാണ്. മെയ് 27ന് നടത്തിയ ഹെര്‍ണിയ ഓപറേഷനിടെയാണ് ആയുഷ് മരിച്ചത്.

അംഗവൈകല്യം മാറ്റുന്നതിനുള്ള ശസ്ത്രക്രിയക്കിടെയാണ് തൊട്ടടുത്ത ദിവസം രാജ്‌വീറിനും ഇതേ അപകടം സംഭവിക്കുന്നത്. അന്വേഷണത്തില്‍ ഓക്‌സിജന്‍ നല്‍കുന്ന പൈപ്പ്‌ലൈനിലൂടെ അനസ്‌തേഷ്യക്ക് ഉപയോഗിക്കുന്ന നൈട്രസ് ഓക്‌സൈഡ് നല്‍കിയതാണ് കുട്ടികളുടെ മരണത്തിനിടയാക്കിയതെന്ന് കണ്ടെത്തിയിട്ടുണ്ട്.
സ്വകാര്യ കമ്പനിയില്‍ നിന്നുള്ള കരാര്‍ ജീവനക്കാരനാണ് ഓപ്പറേഷന്‍ തിയേറ്ററിലെ വാതക പൈപ്പ് കണക്ഷനുകള്‍ കൈകാര്യം ചെയ്തിരുന്നതെന്ന് ആശുപത്രി സൂപ്രണ്ട് അറിയിച്ചു. ജീവനക്കാരനെ പൊലിസ് അറസ്റ്റു ചെയ്തു.