കാസര്‍കോട്: നീലേശ്വരത്തെ പടക്ക അപകടത്തില്‍ ക്ഷേത്രകമ്മിറ്റി ഭാരവാഹികള്‍ അറസ്റ്റില്‍. അഞ്ഞൂറ്റമ്പലം വീരര്‍കാവ് ക്ഷേത്ര കമ്മിറ്റി ഭാരവാഹികളായ പ്രസിഡന്റ് കരുവാശേരി സ്വദേശി ഭരതന്‍, സെക്രട്ടറി  പടന്നക്കാട് സ്വദേശി ചന്ദ്രശേഖരന്‍ എന്നിവരുടെ അറസ്റ്റാണ് രേഖപ്പെടുത്തിയത്. ഇവര്‍ക്ക് പുറമെ പടക്കത്തിന് തീ കൊളുത്തിയ പള്ളിക്കര സ്വദേശി രാജേഷിനെയും നീലേശ്വരം പൊലീസ് അറസ്റ്റ് ചെയ്തു.

വീരര്‍കാവ് ക്ഷേത്രം കളിയാട്ട മഹോത്സവത്തിനായി സൂക്ഷിച്ചിരുന്ന പടക്കങ്ങള്‍ക്ക് തീപിടിച്ച് 154 പേര്‍ക്കാണ് പരിക്കേറ്റത്. 16 പേരുടെ നില ഗുരുതരമാണ്. പടക്കം സൂക്ഷിച്ചിരുന്ന കെട്ടിടത്തിന് സമീപം തന്നെ പടക്കം പൊട്ടിച്ചതാണ് അപകടത്തിന് വഴി വച്ചതെന്നാണ് പ്രാഥമിക വിവരം. പരിക്കേറ്റവര്‍ കേരളത്തിലെയും, കര്‍ണാകയിലെയും വിവിധ ആശുപത്രികളില്‍ ചികിത്സയിലാണ്. 

രാത്രി 12 മണിയോടെയാണ് പടക്കശേഖരണത്തിന് തീപിടിച്ചത്.  ക്ഷേത്ര പരിസരമാകെ ആയിരക്കണക്കിന് ആളുകള്‍ തടിച്ചുകൂടി നില്‍ക്കുന്ന സമയത്തായിരുന്നു അപകടം. ചുറ്റുപരിസരങ്ങളിലുമായി നിന്ന 150 ഓളം പേരാണ് പൊള്ളലേറ്റ് വീണത്. സ്‌ഫോടന ശബ്ദം കേട്ട് പരിഭ്രമിച്ചോടുന്നതിനിടെ തട്ടി വീണും നിരവധി പേര്‍ക്ക് പരിക്കേറ്റു. പരിക്കേറ്റ 157 പേരില്‍ 97 പേര്‍ വിവിധ ആശുപത്രികളിലായി ചികിത്സയിലാണ്.

അതേസമയം മുപ്പതിനായിരം രൂപയുടെ ചൈനീസ് പടക്കങ്ങള്‍ മാത്രമേ വാങ്ങിയിരുന്നുള്ളൂ എന്നാണ് ക്ഷേത്ര കമ്മിറ്റിയുടെ വാദം. സംഭവത്തില്‍ 8 പേരെ പ്രതികളാക്കി പൊലീസ് കേസ് രജിസ്റ്റര്‍ ചെയ്തിട്ടുണ്ട്. ഗുരുതരമായ വീഴ്ചയാണ് ക്ഷേത്ര കമ്മിറ്റിയുടെ ഭാഗത്ത് ഉണ്ടായതെന്ന് കാഞ്ഞങ്ങാട് എം എല്‍ എയും മുന്‍ മന്ത്രിയുമായ ഇ ചന്ദ്രശേഖരന്‍ ആരോപിച്ചു.

Fireworks accident in Nileswaram Three people including temple committee officials were arrested