പനാജി: ഇന്ത്യയിലെ ഏക സജീവ അഗ്നിപര്‍വതത്തില്‍ നിന്ന് 150 വര്‍ഷത്തിന് ശേഷം പുകയും ലാവയും വമിക്കുന്നതായി വിദഗ്ധര്‍. ഗോവ ആസ്ഥാനമായ ദേശീയ സമുദ്ര ഗവേഷണ ഇന്‍സ്റ്റിറ്റ്യൂട്ടിലെ വിദഗ്ധരാണ് ആന്‍ഡമാന്‍ നിക്കോബാര്‍ ദ്വീപ് സമൂഹത്തിലെ ബാരന്‍ അഗ്നിപര്‍വതം വീണ്ടും സജീവമായതായി കണ്ടെത്തിയത്.

150 വര്‍ഷത്തിന് ശേഷം 1991 ലാണ് അഗ്നിപര്‍വതം വീണ്ടും പുകയുന്നതയായി ശ്രദ്ധയില്‍ പെട്ടിരുന്നത്. പോര്‍ട്ട് ബ്ലയറില്‍ നിന്നും 140 കിലോമീറ്റര്‍ വടക്കു കിഴക്കായുള്ള ദ്വീപിലാണ അഗ്‌നിപര്‍വ്വതം സ്ഥിതി ചെയ്യുന്നത്.

2017 ജനുവരി 23നാണ് വീണ്ടും പര്‍വ്വതം പുകയുന്നതായി ശാസ്ത്രജ്ഞരുടെ ശ്രദ്ധയില്‍പ്പെട്ടത്. സമുദ്ര ഗവേഷണ ശാസ്ത്രജ്ഞരുടെ സംഘം ആന്‍ഡമാനിലെ അഗ്‌നി പര്‍വ്വതത്തിനു സമീപം കടലിലെ അടിത്തട്ട് സാംപിള്‍ ശേഖരിക്കുന്നതിനിടെയാണ്? പര്‍വ്വതത്തില്‍ നിന്ന്? പുക വമിക്കാന്‍ തുടങ്ങിയത് ശ്രദ്ധയില്‍ പെട്ടത്. ഒരു മൈല്‍ ദൂരെ നിന്നും പര്‍വ്വതം നിരീക്ഷിച്ചപ്പോള്‍ അഞ്ചു മുതല്‍ പത്തു മിനുട്ട് വരെ പുക വമിക്കുന്നതായി ഗവേഷക സംഘം കണ്ടെത്തി.

പകല്‍ സമയത്തു മാത്രമാണ് പുക ഉയരുന്നതായി കണ്ടത്. രാത്രി സമയങ്ങളില്‍ നിരീക്ഷിച്ചപ്പോള്‍ പര്‍വ്വതമുഖത്തു നിന്നും ചുവന്ന നിറത്തില്‍ ലാവ അന്തരീക്ഷത്തിലേക്ക് തെറിക്കുന്നത് കണ്ടതായും അവര്‍ പറഞ്ഞു.

അഗ്നിപര്‍വതത്തെകുറിച്ച് കൂടുതല്‍ പഠനം നടത്തിയപ്പോള്‍ ഇത് പൊട്ടിത്തെറിക്കാന്‍ സാധ്യതയുണ്ടെന്ന് കണ്ടെത്തിയതായും ഗവേഷക സംഘം വ്യക്തമാക്കി.