അഞ്ചല്‍: വനത്തില്‍ നിന്നും ഈനാംപേച്ചിയെ പിടികൂടി വില്‍ക്കാന്‍ ശ്രമനിച്ച രണ്ടു പേരെ അഞ്ചല്‍ ഫോറസ്റ്റ് റേഞ്ച് ഓഫിസറുടെ നേതൃത്വത്തിലുള്ള വനപാലക സംഘം അറസ്റ്റ് ചെയ്തു. തിരുവനന്തപുരം തൈക്കാട് കാര്‍ത്തികപുത്തന്‍സ്ട്രീറ്റില്‍ താമസക്കാരായ തിരുനല്‍വേലി സ്വദേശികളായ മുത്തുകുമാര്‍ (34) സഹോദരന്‍ ശബരിരാജ (30) എന്നിവരാണ് പാരിപ്പള്ളിയില്‍ വച്ച് പിടിയിലായത്.
അഞ്ചല്‍ ഫോറസ്റ്റ് റേഞ്ച് ഓഫിസര്‍ ബി.ആര്‍ ജയന് ലഭിച്ച രഹസ്യവിവരത്തെത്തുടര്‍ന്ന് നടത്തിയ നാടകീയ നീക്കത്തിലാണ് ഇവര്‍ പിടിയിലായത്. ഉദ്ദേശം നാലു വയസ് പ്രായമുള്ളതും നാല് കിലോഗ്രാം തൂക്കവും രണ്ടടി നീളവുമുള്ള ഈ നാംപേച്ചിയെയാണ് ഇവര്‍ വില്‍ക്കാന്‍ ശ്രമിച്ചത്. ഇവര്‍ സഞ്ചരിച്ച സ്‌കൂട്ടിയും കസ്റ്റഡിയിലെടുത്തിട്ടുണ്ട്.
ഈനാംപേച്ചിയെ വാങ്ങാനെന്ന വ്യാജേന ഇവരുമായി ബന്ധപ്പെട്ട് പത്ത് ലക്ഷം രൂപയ്ക്കു കച്ചവടം ഉറപ്പിച്ച ശേഷം പാരിപ്പള്ളിയിലുള്ള സുരക്ഷിത സ്ഥലത്തെത്തിച്ച് തന്ത്രപരമായ നീക്കത്തിലൂടെയായിരുന്നു അറസ്റ്റ്. പ്രതികളെ പുനലൂര്‍ കോടതിയില്‍ ഹാജരാക്കി.