ഹുദൈബിയ്യ (മീനങ്ങാടി): മദീനാപാഷന്റെ മഹത്വം വിളിച്ചോതി സമസ്തയുടെ വിദ്യാര്‍ഥി പ്രസ്ഥാനം എസ്.കെ.എസ്.എസ്.എഫ് മൂന്ന് ദിനങ്ങളിലായി മീനങ്ങാടി ഹുദൈബിയ്യ നഗറില്‍ നടത്തിയ ജില്ലാ സമ്മേളനത്തിന് പ്രൗഢോജ്ജ്വല സമാപനം. അക്ഷരാര്‍ഥത്തില്‍ മീനങ്ങാടിയെ പാല്‍ക്കടലാക്കിയാണ് സമ്മേളനത്തിന് പരിസമാപ്തി കുറിച്ചത്. സമാപന സമ്മേളനം സമസ്ത അധ്യക്ഷന്‍ മുഹമ്മദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്തു. വഖഫ് ബോര്‍ഡ് ചെയര്‍മാന്‍ പാണക്കാട് റശീദലി ശിഹാബ് തങ്ങള്‍ വെള്ളിയാഴ്ച വൈകിട്ട് ഉദ്ഘാടനം നിര്‍വഹിച്ച സമ്മേളനത്തിന്റെ പതാക ഉയര്‍ത്തിയത് സമസ്ത കേന്ദ്ര മുശാവറ അംഗവും ജില്ലാ പ്രസിഡന്റും മദ്‌റസാ മാനേജ്‌മെന്റ് സംസ്ഥാന പ്രസിഡന്റുമായ കെ.ടി ഹംസ മുസ്‌ലിയാരാണ്. റഹ്മത്തുല്ലാ ഖാസിമി മുഖ്യപ്രഭാഷണം നടത്തിയ ഉദ്ഘാടന ചടങ്ങില്‍ എസ്.വൈ.എസ് ജില്ലാ പ്രസിഡന്റ് ഇബ്രാഹിം ഫൈസി പേരാല്‍ അധ്യക്ഷനായി. ശിഹാബുദ്ധീന്‍ ഇമ്പിച്ചിക്കോയ തങ്ങള്‍ പേരാല്‍ പ്രാര്‍ഥനയും നടത്തി. രണ്ടാം ദിനത്തിലെ മദീനാ പാഷന്‍ സെഷന്‍ കോഴിക്കോട് ഖാസി മുഹമ്മദ്‌കോയ ജമലുല്ലൈലി തങ്ങള്‍ ഉദ്ഘാടനം ചെയ്തു. സമസ്ത മുശാവറ അംഗം വി മൂസക്കോയ മുസ്‌ലിയാര്‍, ആനമങ്ങാട് അബൂബക്കര്‍ മുസ്‌ലിയാര്‍ എന്നിവര്‍ വേദി പ്രൗഡമാക്കി. എസ്.കെ.എസ്.എസ്.എഫ് സംസ്ഥാന ജനറല്‍ സെക്രട്ടറി സത്താര്‍ പന്തല്ലൂര്‍, എസ്.വൈ.എസ് സംസ്ഥാന ജനറല്‍ സെക്രട്ടറി അബ്ദുല്‍ ഹമീദ് ഫൈസി അമ്പലക്കടവ്, സാലിം ഫൈസി കുളത്തൂര്‍, മുസ്തഫ അശ്‌റഫി കക്കുപ്പടി എന്നിവര്‍ വിവിധ സെഷനുകളില്‍ വിഷയാവതരണം നടത്തി. മൂന്നാംദിനത്തിലെ ത്വലബാമീറ്റ് സി.പി ഹാരിസ് ബാഖവി കമ്പളക്കാട് ഉദ്ഘാടനം ചെയ്തു. എസ്.വൈ.എസ് സംസ്ഥാന സെക്രട്ടറി പിണങ്ങോട് അബൂബക്കര്‍ മുഖ്യപ്രഭാഷണം നടത്തി. സി.കെ ശശീന്ദ്രന്‍ എം.എല്‍.എ അവാര്‍ഡ്ദാനവും നടത്തി. സമാപന സമ്മേളനത്തില്‍ കെ.ടി ഹംസ മുസ്‌ലിയാര്‍, അബ്ദുസ്സമദ് പൂക്കോട്ടൂര്‍, എസ് മുഹമ്മദ് ദാരിമി, എം.എം ഇമ്പിച്ചിക്കോയ മുസ്‌ലിയാര്‍ എന്നിവരുടെ സാന്നിധ്യം വേദിക്ക് കരുത്തേകി.