ഷാര്‍ജ: ഐ.പി.എല്‍ താര ലേലത്തില്‍ നാല് കോടി രൂപയ്ക്ക് കിങ്‌സ് ഇലവന്‍ പഞ്ചാബ് ടീമിലെത്തിച്ച അഫ്ഗാനിസ്ഥാന്‍ കൗമാര സ്പിന്‍ സെന്‍സേഷന്‍ മുജീബ് സാദ്രാന് ലോക റെക്കോര്‍ഡ്. ഏകദിന ക്രിക്കറ്റ് പോരാട്ടത്തില്‍ അഞ്ച് വിക്കറ്റുകള്‍ വീഴ്ത്തുന്ന ഏറ്റവും പ്രായം കുറഞ്ഞ ബൗളറെന്ന റെക്കോര്‍ഡാണ് അഫ്ഗാന്‍ താരം സ്വന്തമാക്കിയത്. സിംബാബ്‌വെക്കെതിരായ പോരാട്ടത്തില്‍ 10 ഓവറില്‍ 50 റണ്‍സ് വഴങ്ങി അഞ്ച് വിക്കറ്റ് വീഴ്ത്തി താരം ടീമിന് വിജയം സമ്മാനിച്ചു. മുന്‍ പാകിസ്താന്‍ ഇതിഹാസം വഖാര്‍ യൂനീസിന്റെ പോരിലുണ്ടായിരുന്ന 18 വയസും 164 ദിവസവും എന്ന റെക്കോര്‍ഡാണ് 16 വയസും 325 ദിവസവും പ്രായമായി നില്‍ക്കേ അഞ്ച് വിക്കറ്റെടുത്ത് മുജീബ് സാദ്രാന്‍ തിരുത്തിയത്.
മത്സരത്തില്‍ അഫ്ഗാനിസ്ഥാന്‍ പത്ത് വിക്കറ്റിന് വിജയിച്ചു. ആദ്യം ബാറ്റ് ചെയ്ത സിംബാബ്‌വെയെ മുജീബിന്റെ അഞ്ച് വിക്കറ്റ് പ്രകടന ബലത്തില്‍ 134 റണ്‍സില്‍ ഒതുക്കിയ അഫ്ഗാന്‍ വിക്കറ്റ് നഷ്ടമില്ലാതെ 135 റണ്‍സെടുത്ത് വിജയിക്കുകയായിരുന്നു.