ഡോര്‍ട്മുണ്ട്: യൂറോപ്പ ലീഗ് ഫുട്‌ബോള്‍ ആദ്യപാദ മത്സരത്തില്‍ ആഴ്‌സണല്‍, ബൊറൂസിയ ഡോര്‍ട്മുണ്ട്, എ.സി മിലാന്‍, അത്‌ലറ്റിക്കോ മാഡ്രിഡ്, ഒളിംപിക് ലിയോണ്‍ ടീമുകള്‍ക്ക് വിജയം. മറ്റൊരു മത്സരത്തില്‍ കരുത്തരായ നാപോളി സ്വന്തം തട്ടകത്തില്‍ ലെയ്പ്‌സിഗിനോട് ഒന്നിനെതിരേ മൂന്ന് ഗോളുകള്‍ക്ക് പരാജയപ്പെട്ടു.
ആഴ്‌സണല്‍ സ്വീഡിഷ് ക്ലബ് ഓസ്റ്റര്‍സന്‍ഡ്‌സിനെയാണ് എതിരില്ലാത്ത മൂന്ന് ഗോളുകള്‍ക്ക് പരാജയപ്പെടുത്തിയത്. നാചോ മോണ്‍റിയല്‍ (13), പപ്പാജിയാനോപൗലൂസ് (24, സെല്‍ഫ് ഗോള്‍), മെസുറ്റ് ഓസില്‍ എന്നിവരാണ് ആഴ്‌സണലിന് വേണ്ടി ഗോള്‍ നേടിയത്. ബൊറൂസിയ ഡോര്‍ട്മുണ്ട് രണ്ടിനെതിരേ മൂന്ന് ഗോളുകള്‍ക്ക് അറ്റ്‌ലാന്റയെയും എ.സി മിലാന്‍ 3-0 ത്തിന് ലൂഡോഗോറെറ്റ്‌സിനെയും അത്‌ലറ്റിക്കോ മാഡ്രിഡ് ഒന്നിനെതിരേ നാല് ഗോളുകള്‍ക്ക് കോബന്‍ഹവനെയും ഒളിംപിക് ലിയോണ്‍ 3-1ന് വിയ്യാറയലിനെയും പരാജയപ്പെടുത്തി. അത്‌ലറ്റിക്കോ മാഡ്രിഡിന് വേണ്ടി സൗള്‍ (21), ഗമേറിയോ (37), ഗ്രിസ്മാന്‍ (71), വിറ്റോലോ (77) എന്നിവര്‍ ഗോളുകള്‍ നേടി.