മലപ്പുറം: മുഖ്യമന്ത്രിയേയും സി.പി.എമ്മിനേയും കടന്നാക്രമിച്ച് വീണ്ടും പി.വി അന്‍വര്‍ എം.എല്‍.എ. സി.പി.എം വെല്ലുവിളിക്കുകയാണെങ്കില്‍ അത് ഏറ്റെടുക്കാന്‍ തയാറാണെന്ന് അന്‍വര്‍ മാധ്യമപ്രവര്‍ത്തകരോട് പറഞ്ഞു. മുഖ്യമന്ത്രി തന്നെ കള്ളക്കടത്തുക്കാരനും മലപ്പുറം ജില്ലാ സെക്രട്ടറി വര്‍ഗീയവാദിയുമാക്കിയെന്നും അദ്ദേഹം മാധ്യമങ്ങളോട് പറഞ്ഞു. ഇതുവരെ പറഞ്ഞു നടന്നത് മലപ്പുറം മാപ്പിളയെന്നായിരുന്നു. ഇന്നലെയാണ് ക്രിസ്റ്റ്യന്‍ കോളജ് സ്‌കൂളിലാണ് പഠിച്ചതെന്നും എന്റെ സഹോദരിമാര്‍ പ്രൊവിഡന്‍സ് കോളജിലുമാണ് പഠിച്ചതെന്നും അറിഞ്ഞത്. നമ്മള്‍ എല്ലായിടത്തും ഉണ്ട്. ഏറനാട് മാപ്പിളയുമാണ്. വര്‍ഗീയവാദിയല്ല എന്ന് തെളിയിക്കേണ്ട അധിക ബാധ്യതയായി വന്നു- അദ്ദേഹം പറഞ്ഞു. 

കഴിഞ്ഞ ദിവസം മലപ്പുറത്തു നടന്ന പൊതുയോഗം വിപ്ലവമായി മാറുമെന്നും അന്‍വര്‍ പറഞ്ഞു. പരിപാടിയെ കുറിച്ച് ജനങ്ങള്‍ വിലയിരുത്തട്ടെയെന്നാണ് അദ്ദേഹത്തിന്റെ നിലപാട്. യോഗത്തില്‍ പാര്‍ട്ടി പ്രവര്‍ത്തകരോടും സി.പി.എം ജനപ്രതിനിധികളോടും പങ്കെടുക്കണമെന്ന് ആവശ്യപെട്ടിട്ടില്ല. ഞാന്‍ തീരുമാനിച്ചാല്‍ എല്‍.ഡി.എഫിന്റെ 25 പഞ്ചായത്തുകള്‍ പോകും.
 
തദ്ദേശ തെരഞ്ഞെടുപ്പില്‍ എന്ത് ചെയ്യണമെന്ന് തീരുമാനിക്കുമെന്നും ജനപിന്തുണയുണ്ടെങ്കില്‍ മാത്രം പാര്‍ട്ടി രൂപീകരിക്കുന്നതിനെ കുറിച്ച് ചിന്തിക്കുമെന്നും അന്‍വര്‍ പറഞ്ഞു. 

കേരളത്തിലെ യുവാക്കള്‍ ആശങ്കയിലാണ്. എന്റെ നെഞ്ചത്ത് കയറുന്നതിന് പകരം സര്‍ക്കാര്‍ യുവാക്കളെ അഡ്രസ് ചെയ്യണം. യൂറോപ്യന്‍ രാജ്യങ്ങളില്‍ പോലും പ്രതിസന്ധിയാണ്. യുവാക്കള്‍ക്കായി കൂടുതല്‍ സ്റ്റാര്‍ട്ടപ്പുകള്‍ ആരംഭിക്കണം. അന്‍വര്‍ പറഞ്ഞു.

തടയണ പൊളിക്കല്‍ സംബന്ധിച്ച ചോദ്യത്തിന് പൊളിക്കാന്‍ തടയണ വേണ്ടെയെന്നായിരുന്നു അദ്ദേഹത്തിന്റെ മറുപടി. ഏത് തടയണയാണ് പൊളിക്കുന്നതെന്നും അന്‍വര്‍ ചോദിച്ചു. എനിക്കെതിരെ ഇനിയും കേസുകള്‍ വരും. പാര്‍ക്കിന്റെ കാര്യത്തിലും അതാണ് വരുക. അദ്ദേഹം പറഞ്ഞു.

 സ്വര്‍ണം കൊണ്ട് കൊടുക്കുന്നവരെ എന്താണ് പിടികൂടാത്തതെന്നും അദ്ദേഹം ചോദിച്ചു. മനപൂര്‍വമാണ് മുഖ്യമന്ത്രി തന്നെ കള്ളക്കടത്തുക്കാരനായി ചിത്രീകരിക്കുന്നതെന്നും അദ്ദേഹം പറഞ്ഞു.പി. ശശിക്ക് സ്വര്‍ണ കടത്തില്‍ പങ്കുണ്ടെന്ന് അദ്ദേഹം ആവര്‍ത്തിച്ചു.