ഹുദൈബിയ്യ (മഞ്ചേരി): ഇസ്‌ലാമിക സമൂഹത്തെ വേട്ടയാടുന്നതിന്നും തെറ്റിദ്ധരിപ്പിക്കുന്നതിനുമുള്ള ശ്രമങ്ങള്‍ വര്‍ധിക്കുന്ന സാഹചര്യത്തില്‍ വൈജ്ഞാനിക മുന്നേറ്റത്തിലൂടെ ദിശ കാണിക്കാന്‍ മുന്നോട്ടുവരണമെന്ന് സയ്യിദ് ഹൈദരലി ശിഹാബ് തങ്ങള്‍. പ്രതിസന്ധികളെ അതിജീവിച്ചു മതത്തിന്റെ യഥാര്‍ഥ സന്ദേശം പ്രബോധനം ചെയ്ത അഗാധ പാണ്ഡിത്യത്തിന്റെ ഉടമകളാണ് സമസ്തയ്ക്കു നേതൃത്വം നല്‍കിയതെന്നും തങ്ങള്‍ പറഞ്ഞു.
വിശ്വാസി സമൂഹത്തിന്റെ മാതൃകാ പാതയാണ് മദീനാ വിശുദ്ധിയെന്നും നന്‍മകളെ പുല്‍കാനുംതിന്‍മകളെ തിരസ്‌കരിക്കാനുമുള്ള സന്ദേശമാണ് മദീന നല്‍കുന്നതെന്നും സമസ്ത ജനറല്‍ സെക്രട്ടറി കെ. ആലിക്കുട്ടി മുസ്‌ലിയാര്‍ പറഞ്ഞു. പ്രവാചക ജീവിതമാണ് സര്‍വകാല സമൂഹത്തിനു വിജയമാര്‍ഗമൊരുക്കുന്നതെന്നും വൈജ്ഞാനിക, ശാസ്ത്ര, ഗവേഷണ രംഗത്തെ അതിര്‍വരമ്പുകളിലാത്ത സഞ്ചാരം മദീനയുടെ സന്ദേശത്തിന്റെ പിന്‍ബലമാണന്നും എസ്.വൈ.എസ് സംസ്ഥാന ഉപാധ്യക്ഷന്‍ സയ്യിദ് സ്വാദിഖലി ശിഹാബ് തങ്ങള്‍ പറഞ്ഞു.
തീവ്രവാദ പ്രവണതകള്‍ ഇസ്‌ലാമിനെ തെറ്റിദ്ധരിക്കാനിടയാക്കുമ്പോള്‍ ഇത്തരംപ്രവണതകളെ തടഞ്ഞുനിര്‍ത്തി സമുദായത്തിനു നേതൃത്വമേകിയ പ്രസ്ഥാനമാണ് സമസ്തയെന്നു പ്രതിപക്ഷ ഉപനേതാവ് പി.കെ കുഞ്ഞാലിക്കുട്ടി പറഞ്ഞു.