തിരുവനന്തപുരം: സംസ്ഥാനത്തെ 45,000 ക്ലാസ്മുറികള്‍ ഹൈടെക്കാക്കുന്നതിന്റെ ഭാഗമായി എല്ലാ അധ്യാപകര്‍ക്കും അവധിക്കാലത്ത് പരിശീലനം നല്‍കാന്‍ തീരുമാനം. പൊതുവിദ്യാഭ്യാസ സെക്രട്ടറി എ. ഷാജഹാന്റെ അധ്യക്ഷതയില്‍ ചേര്‍ന്ന വകുപ്പു ഡയറക്ടര്‍മാരുടെ യോഗത്തിലാണ് തീരുമാനം.
ഡിജിറ്റല്‍ വിഭവങ്ങള്‍ ക്ലാസ്മുറിയില്‍ പ്രയോജനപ്പെടുത്താനും അക്കാദമിക് വിഷയങ്ങള്‍ കൂടുതല്‍ വ്യക്തതയോടെ കൈകാര്യംചെയ്യാനും കഴിയുന്നവിധത്തിലായിരിക്കും ഈ വര്‍ഷത്തെ അവധിക്കാല പരിശീലനം. അധ്യാപകരുടെ രജിസ്‌ട്രേഷന്‍, പരിശീലന ഷെഡ്യൂളിങ്, അറ്റന്റന്‍സ്, ഫീഡ്ബാക്ക് തുടങ്ങിയവ ഓണ്‍ലൈനായി മോണിറ്റര്‍ ചെയ്യാന്‍ കൈറ്റ് സംവിധാനമൊരുക്കും. എസ്.സി.ഇ.ആര്‍.ടിയുടെ അക്കാദമിക് നേതൃത്വത്തില്‍ വിവിധ ഡയറക്ടറേറ്റുകളും എസ്.എസ്.എ, ആര്‍.എം.എസ്.എ പ്രൊജക്ടുകളും സംയുക്തമായാണ് മൊഡ്യൂള്‍ തയാറാക്കുന്നത്.