റിയാദ്: സഊദിയുടെ വിവിധ ഭാഗങ്ങളില്‍ മഴയും കനത്ത ആലിപ്പഴ വര്‍ഷവും. ശൈത്യകാലത്തിന്റെ പിന്‍വാങ്ങലും വസന്തത്തിന്റെ വരവുമറിയിച്ചാണു രാജ്യത്തിന്റെ വിവിധ ഭാഗങ്ങളില്‍ മഴ പെയ്തത്. കഴിഞ്ഞ രണ്ടു ദിവസങ്ങളില്‍ കനത്ത മഴക്കും പൊടിക്കാറ്റിനും സാധ്യതയുണ്ടെന്നു നേരത്തെ തന്നെ കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കിയിരുന്നു. ഇതിന്റെ ഭാഗമായി വിവിധ പ്രവിശ്യകളില്‍ രണ്ടു ദിവസം വിദ്യാലയങ്ങള്‍ക്ക് അവധി നല്‍കുകയും വീടുകളില്‍നിന്നു പുറത്തിറങ്ങരുതെന്ന് സിവില്‍ ഡിഫന്‍സ് അതോറിറ്റി പൗരന്മാര്‍ക്കു നിര്‍ദേശം നല്‍കുകയും ചെയ്തിരുന്നു.