തിരുവനന്തപുരം: സ്വാശ്രയ മെഡിക്കല്‍ കോളജുകളിലെ എന്‍.ആര്‍.ഐ സീറ്റുകളിലെ ഫീസുകള്‍ പുതുക്കി നിശ്ചയിച്ചു.
നാലുകോളജുകളിലൊഴികെ ഈ അധ്യയന വര്‍ഷത്തിലും, അടുത്ത അധ്യയന വര്‍ഷവും 20 ലക്ഷം രൂപയായിരിക്കും എന്‍.ആര്‍.ഐ ഫീസ്. ജസ്റ്റിസ് രാജേന്ദ്രബാബു അധ്യക്ഷനായ ഫീ റഗുലേറ്ററി കമ്മിറ്റിയാണ് ഇതുസംബന്ധിച്ച ഉത്തരവ് പുറപ്പെടുവിച്ചത്.
ഇതില്‍ അഞ്ച് ലക്ഷം രൂപ ബി.പി.എല്‍ വിദ്യാര്‍ഥികള്‍ക്ക് സ്‌കോളര്‍ഷിപ്പ് നല്‍കാനുള്ള കോര്‍പ്പസ് ഫണ്ടിലേക്ക് മാറ്റണം. അതേസമയം, ക്രിസ്ത്യന്‍ മെഡിക്കല്‍ കോളജുകളായ അമല, ജൂബിലി, മലങ്കര, പുഷ്പഗിരി മെഡിക്കല്‍ കോളജുകളില്‍ ഈ വര്‍ഷം എന്‍.ആര്‍.ഐ ഫീസ് 18 ലക്ഷമായിരിക്കും, അടുത്ത വര്‍ഷം ഇത് 20 ലക്ഷമായി വര്‍ധിപ്പിക്കും.
ഈ തുകയില്‍ നിന്നും അഞ്ച് ലക്ഷം രൂപയും സ്‌കോളര്‍ഷിപ്പിനുള്ള കോര്‍പ്പസ് ഫണ്ടിലേക്ക് മാറ്റും. ഇതുസംബന്ധിച്ച് ഹൈക്കോടതിയുടെ പരിഗണനയിലുള്ള കേസിന്റെ അന്തിമ വിധിക്ക് വിധേയമായിട്ടാണ് ഫീസ് നിശ്ചയിച്ചത്.