മുംബൈ: ഇന്ത്യന്‍ ജൂനിയര്‍ ക്രിക്കറ്റ് ടീം സെലക്ഷന്‍ കമ്മിറ്റി ചെയര്‍മാന്‍ സ്ഥാനത്ത് നിന്ന് മുന്‍ പേസര്‍ വെങ്കിടേഷ് പ്രസാദ് രാജിവച്ചു. ഇന്ത്യയുടെ അണ്ടര്‍ 19 ടീം ലോകകപ്പ് നേടി ഒരു മാസം തികയുമ്പോഴാണ് പ്രസാദ് സ്ഥാനം ഒഴിയുന്നത്. കഴിഞ്ഞ രണ്ടര വര്‍ഷമായി ജൂനിയര്‍ ടീം സെലക്ഷന്‍ കമ്മിറ്റിയുടെ തലവനായി പ്രസാദ് പ്രവര്‍ത്തിക്കുകയായിരുന്നു. ഇരട്ട പദവി വഹിക്കുന്നത് സംബന്ധിച്ച് നിയമ പ്രശ്‌നങ്ങള്‍ ഇല്ലാതിരിക്കുക ലക്ഷ്യമിട്ടാണ് പ്രസാദ് സ്ഥാനം ഒഴിയുന്നതെന്നും ഏതെങ്കിലും ഐ.പി.എല്‍ ടീമിന്റെ ഭാഗമായി പ്രസാദ് പ്രവര്‍ത്തിക്കാന്‍ സാധ്യത ഉള്ളതായും ബി.സി.സി.ഐയോട് അടുത്ത വൃത്തങ്ങള്‍ സൂചിപ്പിച്ചു.