മാഡ്രിഡ്: സ്പാനിഷ് ലാ ലിഗ പോരാട്ടത്തില്‍ ബാഴ്‌സലോണയെ സമനിലയില്‍ കുരുക്കി ലാസ് പല്‍മാസ്. സ്വന്തം തട്ടകത്തില്‍ 1-1നാണ് അവര്‍ കറ്റാലന്‍ കരുത്തരെ ഒപ്പം പിടിച്ചത്. സൂപ്പര്‍ താരം ലയണല്‍ മെസ്സിയിലൂടെ 21ാം മിനുട്ടില്‍ ലീഡെടുത്ത ബാഴ്‌സലോണയെ 48ാം മിനുട്ടില്‍ ലഭിച്ച പെനാല്‍റ്റി വലയിലെത്തിച്ചാണ് ലാസ് പല്‍മാസ് തളച്ചത്.
ലാസ് പല്‍മാസിനോടേറ്റ അപ്രതീക്ഷിത സമനില ഒന്നാം സ്ഥാനത്തുള്ള ബാഴ്‌സലോണയെ വെട്ടിലാക്കുന്ന അവസ്ഥയിലേക്ക് കാര്യങ്ങളെത്തിച്ചിരിക്കുകയാണ്. കിരീട പോരാട്ടത്തില്‍ എതിരാളികളെ പിന്നിലാക്കി ചാംപ്യന്‍ പട്ടം ഏറെക്കുറേ ഉറപ്പിച്ച് മുന്നേറിയിരുന്ന ബാഴ്‌സയ്ക്ക് ഈ സമനില വേവലാതി സമ്മാനിക്കാന്‍ പര്യാപ്തമായിരിക്കുകയാണ്. കിരീട പോരാട്ടത്തിലേക്ക് ഇപ്പോള്‍ അത്‌ലറ്റിക്കോ മാഡ്രിഡും കടന്നുവന്നിരിക്കുന്നു. നിലവില്‍ 26 കളികളില്‍ നിന്ന് 66 പോയിന്റുമായി ബാഴ്‌സലോണയാണ് ഒന്നാം സ്ഥാനത്ത് നില്‍ക്കുന്നത്. രണ്ടാം സ്ഥാനത്തുള്ള അത്‌ലറ്റിക്കോ മാഡ്രിഡിന് ഇത്രയും കളികളില്‍ നിന്ന് 61 പോയിന്റ്. ബാഴ്‌സയും അത്‌ലറ്റിക്കോയും തമ്മില്‍ അഞ്ച് പോയിന്റ് മാത്രമാണ് ഇപ്പോള്‍ വ്യത്യാസം. 25 മത്സരങ്ങള്‍ പൂര്‍ത്തിയായപ്പോള്‍ ഏഴ് പോയിന്റ് വ്യത്യാസമായിരുന്നു ഇരു ടീമുകളും തമ്മില്‍. അത്‌ലറ്റിക്കോ കഴിഞ്ഞ ദിവസം ലെഗാനസിനെ മറുപടിയില്ലാത്ത നാല് ഗോളുകള്‍ക്ക് വീഴ്ത്തി വിജയം സ്വന്തമാക്കിയിരുന്നു. ഇപ്പോള്‍ ബാഴ്‌സയ്ക്ക് സമനിലയിലൂടെ രണ്ട് പോയിന്റ് നഷ്മായത് ഫലത്തില്‍ അത്‌ലറ്റിക്കോയ്ക്കാണ് ഗുണമായത്. മാത്രമല്ല ഈ മാസം നാലിന് ഇരു ടീമുകളും നേര്‍ക്കുനേര്‍ വരികയാണ്.