തൊടുപുഴ: കൂടംകുളം വൈദ്യുതിയില്‍ കുറവുണ്ടാകുകയും ഹോളി ആഘോഷം മൂലം ജിന്‍ഡാല്‍ പവര്‍ പ്ലാന്റില്‍ ഉല്‍പാദനം ഇടിയുകയും ചെയ്തതിനാല്‍ കേരളത്തിനുള്ള കേന്ദ്ര വൈദ്യുതിയില്‍ കുറവ്. ഇതേത്തുടര്‍ന്ന് കെ.എസ്.ഇ.ബി ആഭ്യന്തര ഉല്‍പാദനം വീണ്ടും ഉയര്‍ത്തി.

കൂടംകുളം നിലയത്തിലെ യന്ത്രത്തകരാര്‍ മൂലം 130 മെഗാവാട്ടിന്റെ കുറവാണ് കേരളത്തിനുണ്ടാകുന്നത്. ഹോളി ആഘോഷത്തില്‍ കല്‍ക്കരിപ്പാടങ്ങള്‍ നിലച്ചതിനാലാണ് ചത്തീസ്ഗഡിലെ ജിന്‍ഡാല്‍ പവര്‍ പ്ലാന്റില്‍ ഉല്‍പാദനം ഇടിഞ്ഞത്. അതിനാല്‍ 47.61 ദശലക്ഷം യൂനിറ്റ് വൈദ്യുതി മാത്രമായിരുന്നു ഇന്നലെ കേരളത്തില്‍ പുറത്തുനിന്ന് എത്തിയത്. ഇതേത്തുടര്‍ന്ന് സംസ്ഥാനത്തെ ആഭ്യന്തര ഉല്‍പാദനം ഇന്നലെ 27.12 ദശലക്ഷം യൂനിറ്റായി ഉയര്‍ത്തി.

62 ദശലക്ഷം യൂനിറ്റുവരെ വൈദ്യുതി പുറത്തുനിന്ന് എത്തിക്കാന്‍ നിലവില്‍ ഗ്രിഡുകള്‍ക്ക് ശേഷിയുണ്ട്. കഴിഞ്ഞ ദിവസങ്ങളില്‍ 59 ദശലക്ഷം യൂനിറ്റ് വരെ എത്തിച്ചിരുന്നു. വൈദ്യുതി ഉപഭോഗം കൂടിവരുകയും കേന്ദ്ര വിഹിതത്തില്‍ കുറവുണ്ടാകുകയും ചെയ്തതോടെ ആഭ്യന്തര ഉല്‍പാദനം ഉയര്‍ത്തുക മാത്രമാണ് കെ.എസ്.ഇ.ബിക്ക് മുമ്പിലുള്ള പോംവഴി. 74.735 ദശലക്ഷം യൂനിറ്റായിരുന്നു ഇന്നലത്തെ സംസ്ഥാനത്തെ വൈദ്യുതി ഉപഭോഗം.

യൂനിറ്റിന് ശരാശരി രണ്ടര - മൂന്നര രൂപാ നിരക്കില്‍ കേരളത്തിനു കേന്ദ്രവിഹിതമായി ദിവസവും 35 ദശലക്ഷം യൂനിറ്റ് വരെ വൈദ്യുതി ലഭിക്കേണ്ടതാണ്.ഇതിന് പുറമെയാണ് ശരാശരി നാലുരൂപ നിരക്കില്‍ പവര്‍ പര്‍ച്ചേസ് എഗ്രിമെന്റ് പ്രകാരം ലഭിക്കുന്ന 25 ദശലക്ഷം യൂനിറ്റ്. കരാര്‍ ലംഘിച്ചാല്‍ പിഴ ലഭിക്കാന്‍ വ്യവസ്ഥയുണ്ട്.