തിരുവനന്തപുരം: കനത്ത ചൂടില്‍ എസ്. എസ്. എല്‍.സി പരീക്ഷ എഴുതാന്‍ വരുന്ന വിദ്യാര്‍ഥികള്‍ക്ക് സംരക്ഷണമൊരുക്കി വിദ്യാഭ്യാസ വകുപ്പ്. എല്ലാ പരീക്ഷാ കേന്ദ്രങ്ങളിലും കുടിവെള്ളവും മറ്റു സൗകര്യങ്ങളും ഒരുക്കാന്‍ പരീക്ഷാ കമ്മിഷണര്‍ കൂടിയായ പൊതു വിദ്യാഭ്യാസ വകുപ്പ് ഡയറക്ടര്‍ കെ.വി മോഹന്‍കുമാര്‍ എല്ലാ സ്‌കൂളുകള്‍ക്കും നിര്‍ദേശം നല്‍കി. പരീക്ഷ വിദ്യാര്‍ഥി സൗഹൃദമാക്കുകയാണ് ലക്ഷ്യം.
മുന്‍ വര്‍ഷങ്ങളില്‍ നിന്ന് വ്യത്യസ്തമായി വിദ്യാര്‍ഥികള്‍ക്ക് തിരഞ്ഞെടുത്ത് ഉത്തരം എഴുതാന്‍ പാകത്തില്‍ ഓരോ പാര്‍ട്ടിലും 25 ശതമാനം ചോദ്യങ്ങള്‍ അധികം നല്‍കിയിട്ടുണ്ട്. ഓരോ വിഷയത്തിനും എട്ട് സെറ്റ് ചോദ്യങ്ങളാണ് ഇത്തവണ തയാറാക്കിയിരിക്കുന്നത്. ഇതില്‍ ഒരു സെറ്റ് ചോദ്യം മോഡല്‍ പരീക്ഷയില്‍ ഉപയോഗിച്ചു. കഴിഞ്ഞ വര്‍ഷം വരെ ഇത് നാല് സെറ്റ് ചോദ്യമായിരുന്നു. ചോദ്യപേപ്പര്‍ സെറ്റ് ചെയ്തവരില്‍ നാലില്‍ മൂന്ന് പേരും ഇത്തവണ വിഷയം പഠിപ്പിക്കുന്ന ഹൈസ്‌കൂള്‍ അധ്യാപകര്‍ തന്നെയാണ്. ഒരാള്‍ ഹയര്‍സെക്കന്‍ഡറി അധ്യാപകനും ചെയര്‍മാന്‍ കോളജ് അധ്യാപകനുമാണ്.